الخميس، 21 أغسطس 2008

كوابيس

كوابيس كوابيس كوابيس

الكوابيس والأحلام تعتبر من الحاجات الغريبة واللى ملهاش تفسير منطقي عن كيفية حدوثها أو ايه الجزء اللى فى دماغنا اللى بيخلينا نحلم؟ محدش يعرف
ومن المعروف يعني أن الأحلام بتعبر عن شخصية الإنسان وعن أمنياته وطريقة تفكيره بدون ما يبقي فيه حدود لكل ده لأن محدش غيره بيشوف أحلامه وبالتالى بيقدر يعمل اللى هو عايزه
يعنى مثلا أنا شخصيا من النوع اللى بأحلم سواء حلم حقيقي أو حلم زى ما بيتقال حلم يقظة أني بأعمل كل الحاجات اللى مابقدرش أعملها فى الحقيقة -أو اللى طبيعتي بتمنعني من أني أعملها -كطريقة مني عشان أخرج الضغط النفسي اللى بينتج
عن عدم قدرتي على فعل الحاجات دي
ايه كل التحاليل النفسية دى؟؟ مش عارفة والله
الموضوع بقي اللى عايزة أتكلم فيه هو أن تقريبا معظم الناس عندها كابوس معين من زمان قوى من أيام الطفولة كابوس بيقدر يخليك تصحى من النوم مخضوض زى أى طفل صغير
حاجة غريبة فعلا أنك يبقي عندك كابوس كده معين دايما بتحلم بيه مش لازم كل يوم أو كل شهر بس بتبقي كل مدة كده تلاقيك حلمت نفس الكابوس وصحيت بنفس الخضة
أنا مش عارفة اذا كان كل الناس كده ولا أنا بس اللى كده ولا ايه ظروفكم عشان كده قلت أسأل وأشوف الناس كوابيسها ايه وبتعبر عن ايه الكوابيس دى
أنا عامة الكابوس بتاعي تقريبا يعنى بيعبر عن خوفي الدائم من أني أتحط فى موقف أبقي عاجزة فيه عن اتخاذ أى قرار أو أبقي عاجزة عن أني أحل المشكلة اللى أنا فيها
لأن كابوسي بيبقي دايما أني بأهرب من حد أو وحش عجيب وبعدين أفقد القدرة على الحركة تماما بأبقي عايزة أجري بس رجليا مابستمعش كلامي وتنفذ الأمر وتجري وأحاول أصرخ بس مفيش صوت بيطلع مني وبأبقي عاجزة تماما عن أني أعمل أى حاجة
كابوس وحش قوى بالنسبة ليا وبأحلم بيه من وأنا صغيرة من أول ما وعيت على الدنيا زى ما بيقولوا وفعلا هو بيعبر عن عقدة من عقدي الكتيرة :D
يا ترى لو أنتوا كده فعلا ايه هى الكوابيس بتاعتكم ؟؟؟؟
سؤال يطرح نفسه :D
عايزة كده كل واحد يدخل يقول بشجاعة كده ويحكى وإن شاء الله أحاول أعمل نفسي دكتورة نفساوية وأحللكم زى ما حللت نفسي التحليل الغريب ده ونشوف عقد الناس ايه عشان تهون على كل واحد عقدته ;)
سلاااام

هناك 21 تعليقًا:

رحــــيـل يقول...

ههههههههههه
شوفى يادكتوره نفساويه انا كمان فسرت الكابوس بتاعى
هههههههههههههه
باين كلنا باقينا دكاتره ولا ايه
يعنى مثلا انا دايما بحلم انى فى بلد غريبة للشغل او زيارة واني تاييه فيها وفي حد بيطاردني وطول الحلم وانا بحاول اهرب وبجرى واستخبى منه

بس مش هقولك على تفسيره ههه انا قولته قبل كده عندى فى المدونه مستنيه اعرف تفسيرك واشوف انهى اقرب
هههههههههه
وبعدين احنا بلديات ده لينك الجروب بتاع مدونى الدقهلية
http://www.facebook.com/group.php?gid=18252776335

هستنى تشرفينا

تامر المصرى يقول...

السلام عليكم ورحمة الله وبركاته
كل عام وانتى بخير يا انسة سارة
انا اسمى تامر المصرى واكون سعيد جدا لو اترسلنا على المدونات بتعتنا وشوفت منك تعليق جمنيل زى الكلام الى انت كتباه
انا اميلى على الياهو لو حبيتى تستفسرى عن شئ
ma_nh15@yahoo.com

محمد فاروق الشاذلى يقول...

عن نفسى فى كابوس معين مش هاعرف أحكيه لكن ليه تأثير عجيب عليا جداً وهو إنى كل ما احلم بيه لازم اصحى تانى يوم عيان أو عندى برد.
تفتكرى ليه يادكتور

MY FATE يقول...

رحيل
أهلا بيكي الأول كده
ثانيا بقي خدي عندك التحليل النفساوي بتاعي أعتقد أنك بتخافى تبعدي عن الناس اللى تعرفيهم أو تقعي فى مشكلة وأنتي بعيد عن الناس اللى هما قريبين منك يعنى حاجة زى كده
وأنا اصلا مبرمجة مش عارفة مالى انا ومال الكلام ده كله :D

تامر المصرى
وعليكم السلام ورحمة الله وبركاته
وأنت بخير يا أستاذ تامر
نورت المدونة

قلب مصري
ماشى مش لازم تحكى بس ربنا يبعدك عنك الكابوس ده ويمكن مش بيبقي تعب قد ما هو حالة نفسية فبتحس أنك تعبان
شكلى بعد كده هاخد فلوس على التحاليل النفسوية اللى كلها غلط دى :D
ونورت المدونة

Adel Mody يقول...

ههههههههههههههه

انا كمان بحلم بنفس الكابوس ان واحد بيجرى ورايا وبكون متكتف ومش قادر اتحرك بس اما بصحى بحمد ربنا بيكون كابوس صعب جدا :(


شكلك مش هتبأى دكتورة شكلك هتفسرى احلام

:)

MY FATE يقول...

Adel Mody
هههههههههههههههههههه
والله كويس أن طلع فيه ناس زيي بتحلم نفس الكابوس بتاعي بس هو فعلا كابوس مخيف
وبعدين دكتورة نفساوية أو تفسير أحلام مش فارقة المهم الفلوس :D
شكرا لمرورك
سلام

Unknown يقول...

الكوابيس معايا بتمثلى أكبر مشكله فى حياتى. مش عشان هى كوابيس ...

الموضوع وما فيه انى زملكاوى وكمان زملكاوى متعصب ويمك مش بيبان عليه انى متعصب .

وعشان كده ليلة كل ماتش أهلى وزمالك بحلم انى انا حارس المرمى بتاع الزمالك وبيدخل فيه 6 اجوان وكلهم كوبرى :d

عشان كده بيبقى مزاجى وحش طول يوم الماتش

عندك علاج للكابوس ده يادكتوره من غير ماتقولى انى ابقى اهلاوى ؟؟؟!!!!!

تامر المصرى يقول...

السلام عليكم
كويس انك تلاقى ناس تشركك احساسك
تحس انها فهماك من غير ما تسمعهم ولا يسمعوك
ان الصاقة شئ جميل جدا
شكرا
تامر المصرى

Amgad يقول...

ياساتر يا رب
كوابيس
فعلا حاجه صعبة اوي
انا مرة حلمت اني بعوم في المية
وصحيت م النوم غرقان
ومرة تانية حلمت اني بلعب كورة
وصحيت رجلي فيها شد عضلي
عشان كده بحب انام متاخر
علي ميكون نص الكابوس خلص
مفهمش النص التاني
اقوم مترعبش
خالص تحياتي

MY FATE يقول...

soul_of_darkness
لألأ مش هاقدر أقولك تبقي أهلاوي أصل انا بأشجع الزمالك برضه :D وعامة هو أكيد ربنا هيكرمنا ونكسب الأهلى قريب
والحل بتاعي بلاش تنام خالص ليلة أى ماتش بين الأهلى والزمالك :D
شكرا على مرورك

تامر المصرى
فعلا الصداقة مهمة وأنا ربنا كرمني بأربع أصحاب زى العسل ربنا يخليني ليهم :D

Amgad
ايه الكابوس العجيبة دي؟؟؟ احنا كده هندخل فى ما وراء الطبيعة والأحلام اللى بتسيب أثر مادي
والحمد لله أنك حليت المشكلة لوحدك عشان أنا مفيش عندي حل ليها :D
نورت المدونة

سلااااماااات

M Al3wady يقول...

السلام عليكم
أولا لأحلام من نعم ربنا سبحانه وتعالى على كل البشر والانسان اللى ما بيحلمش غالبا ما يصاب باضطرابات نفسية
علميا المخ بيفضل يشتغل علطول حتى والانسان نايم بس مراكز معينة منه بس
الأحلام سببها الأكيد لسة ما اتحددش لأن النوم لغز علمى حتى الأن لم يتم حله لكن التجارب اللى اتعملت اثبتت ان الأحلام نوع من التفكير فممكن يكون فكرة مش عارف تحققها وانت صاحى فتحققها وانت نايم او حاجة خايف منها او مشكله بتفكر فى حل ليها ويجيلك فى الحلم والتاريخ مليان قصص زى كده مثلا نابليون كا بيحط بعض الخطط وهو نايم وبعض الشعراء كان ينظم الشعر وهو نام وغيرهما الكثير
كمان البيئة المحيطة بيك وانت نايم لها تأثير كبير على الحلم يعنى مثلا لو السرير مش مريح ممكن الحلم يكون كابوس او مثلا لو تقلت فى الأكل قبل النوم هتحلم ان حد بيخنقك وهكذا.......
وكل سنة وانتم طيبين ورمضان كريم ولو عايزين كلام طبى عن النوم والأحلام انا ممكن اجيب لكم حبة معلومات من اللى درسناها فى الكلية

MY FATE يقول...

The Aorta
شكرا على مرورك
"مثلا نابليون كا بيحط بعض الخطط وهو نايم وبعض الشعراء كان ينظم الشعر وهو نام وغيرهما الكثير"
فعلا !!!! أصل أنا كمان لو نمت وأنا مش عارفة أحل مسألة رياضة أيام ثانوى وكده كنت بحلم بالحل وحاليا البرمجة برضه ساعات أنام أحلم بالبرامج وكده :D
"وكل سنة وانتم طيبين ورمضان كريم ولو عايزين كلام طبى عن النوم والأحلام انا ممكن اجيب لكم حبة معلومات من اللى درسناها فى الكلية"
وأنت طيب والله أكرم
ويا ريت تبقي تجيب المعلومات اللى عندك , أنا كنت قرأت أصلا عن الموضوع فى قصص ما وراء الطبيعة بتاعت د.أحمد خالد توفيق وعرفت معلومات من أخويا السكير برضه ;)

محمد فاروق الشاذلى يقول...

كل رمضان وحضرتك بخير
اللهم بلغنا ليلة القدر واجعلنا من عتقاء هذا الشهر

MY FATE يقول...

قلب مصرى
كل سنة وحضرتك طيب
وكل الأمة بخير
وربنا يكرمنا ويغفرلنا فى رمضان
رمضان كريم علينا
سلاااام

كـــيــــــــارا يقول...

ههههههههههههههههه

عاوزه تكوني محلله نفساويه ليه يبنتي هيجيلك كل الامراض اللي في الدنيا

خليكي كده احسن

كل سنه وانتي طيبه

hager يقول...

مممممممممممم كوابيس
صراحه الكوابيس عندي بترتبط باحداث اليوم
يعني ممكن حد يزعلني انام واحلم بكابوس وحش يكون الشخص ده مثلا بيأذيني ولا حاجه
وهكذاا يعني
بس ما اعتقدتش ان في كابوس واحد بيتكرر معايا
شكراا يا بشدكتوره علي البوست :)

MY FATE يقول...

كيارا
هههههههههه ما أنا فيا كتير عادي مش هتأثر بس عشان خاطرك هأركز فى البرمجة وخلاص
وكل سنة وأنتي طيبة
ونورتي المدونة

hager
أنا برضه بأحلم ساعات بحاجات حسب احداث اليوم بس لو حد ضايقني بأحلم أن أنا بضايقه :D
وحلوة قوى بشدكتورة دي :D
ونورتي المدونة وكل سنة وأنتي طيبة

M Al3wady يقول...

كل سنة وانتم طيبين
أنا كتبت موضوع النوم زى ما قلت لكم يا ريت تشوفوه وتقولولى رأيكم فيه ولو حد عنده أسئلة ان شاء الله أجاوبه عليها

Unknown يقول...

يوم لما شفت تعليقك في مدونتي فرحت جدا انك استجبتي لدعوتس أو عجبك شيء في المدونة وفرحت أكتر عشان هأكتسب قارئ جديد ومعلق على كتاباتي بس مش عارف انقطعتي ليه مع اني بأنتظر تعليقاتك باستمرار ممكن أعرف السبب ولو مكانش فيه غير السهو والنسيان يبقى مدونتي مازالت تنتظرك..
كل ودي

غير معرف يقول...

ezayek ya Soso
shofy b2a ya doctor
ana 3andy 7elmein bashofhom kteer
the first: enny bakoon fi el share3 masalan aw fi el beit w m3aya nas kteer a3rafhom w few ma3rafhomsh wfag2ah ala2y maya 3la el 2ard wmostawaha beyzeid l7ad
ma tewsal lrokbety keda
el ghareib welmo2rif
en el maya btebda2 tkoon msh ndefa
la2 wkaman fiha 7agat bet3oom
samak soghayar masalan aw ens aw gin ma3rafsh
el mohim enny bakoon 5ayfah 2wy
ala reglayaweba3dein bas7a
the second: el 7elm dah bya5talif mn marah lemarah 7agat basetah
bakoon ana weshwaya mn osrety fi moshkelah aw 5atar kbeer
wdayman b7awel anqiz o5ty el akbar minny belzat 7atta law ana haye7sally 7agah
ya3ny el mohim heya wdayman heya betkoon bet3ayat
bas ya setty dol el kawabis elly betetkarar 3andy
argo an tashmaliny bestesharah sari3ah minnik ya doctor
wmat5afish habsetek fi el vizitaaa
fi b2a mawdo3 tany 3ayzah atkalim fih mortabet bardo bela7lam
howa el a7lam elly betet7a2a2
ya reit law 7ad 3andoh tagareb mn de ye7kilna 3liha
w 2alf salam

MY FATE يقول...

غير معرف
دكتور ايه بس؟؟
لسه كده ما أنتي عارفة العداوة اللى بيني وبين طب بسببك وبسبب أخويا
ما علينا
عامة يعنى أول حلم ده تقريبا سببه اللى بيحصلنا سوا فى البحر :D
أو يمكن أنتي بتخافي من الحاجات اللى مش بتقدري تتحكمي فيها أو توجهيها زى ما أنتي عايزة يعنى خطر معين أنتي مش عارفة تخلصي منه حاجة زي كده
أما بقي تاني حلم
أعتقد أنه سببه أنك أصلا بطبيعتك بتشيلي هم الناس اللى حواليكي وأكيد أهم ناس تشيلي همهم هما أسرتك
وكمان أختك لأنكم قريبين من بعض فى السن وعلى طول سوا
ولولا أنها مش هنا كنت هأقولك بعد كده ابقي اجري وسيبيها :D
وحكاية الفيزيته دي انا مش هأخد منك عشان بعد كده لما تتخرجي مش تاخدي مني :D
نورتي المدونة
سلاااام