السبت، 6 فبراير، 2010

مميزات أن تكون مكتئبا


طبعا فى البداية
كل سنة وأنتوا طيبين آخر اجازة نص سنة لينا
مبروك علينا كلنا وإن شاء الله تبقي حلوة علينا كلنا والترم الجاي يبقي حلو ونتخرج كلنا سوا إن شاء الله :)

مميزات أن تكون مكتئبا

أولا: تستطيع أن تحصل على ما تريد من أهلك
مثال: اهلك شايفين أنك مكتئب وحزين تروح تقولهم أنك عايز تطلع رحلة مثلا أكيد هيوافقوا ما أنت مكتئب بقي وهما عاوزينك ترجع تفرفش
وقس علي هذا الكثير

ثانيا: تستطيع أن تتهرب من طلبات البيت
مثال: أنتي قاعدة مكتئبة وحزينة وقافلة الأوضة وشكلك زي اللى ماتلك حد
عمر ما الحاجة هتدخل عليكي تزعق وتقولك ده منظر أوضة بنت قومي نضفي الأوضة
بالعكس احتمال تدخل هي تنضفها
وكده تبقي أرتحتي من التنضيف

ثالثا: تستطيع أن تتهرب من بعض المسئوليات
مثال: صاحبك جاي مخنوق من مادة ومش عارف يحل الشيت وبيقولك هات الشيت بتاعك عشان ينقل أو عاوزاك تحلله الشيت بتاعه عشان مش فاضى
هيلاقى أنك مكتئب وحزين وشكلك يجيب الهم هيسيبك واحتمال-لو حظك حلو- ياخد هو شيتك يحله مع بتاعه


رابعا : تستطيع كسب تعاطف الآخرين
مثال: شغال فى مشروع التخرج ومكتئب وحزين عمر ما حد هيفكر يجي يشيلك جزء زيادة
أو داخل مثلا تمتحن وشكلك كئيب وحزين
هتصعب على الدكتور واحتمال-هو احتمال صعب شويتين بس وارد الحدوث-
ينجحك شفقة على حالك

خامسا: تستطيع أن تقترب أكثر من الله ومن الناس أيضا
مثال: فى فترة الكأبة تقترب أكثر من الله ما أنت فى زنقة بقي ومحتاج تدعي ربنا يفكها
وأيضا تستطيع أن تشعر بالحزن من حولك أكثر وبالتالي تقترب من البشر ومشاكلهم وتفهم الحياة بعمق أكثر

سادسا :توفير فى الأموال
مثال: ما أنت طبيعي لما تكتئب لا هتبقي عاوز تخرج ولا تاكل ولا تتفسح ولا أى حاجة
وبالتالي تقدر توفر فى الميزانة أكتر
عشان كده البلد كلها مكتئبة كتوفير فى الأموال :D

سابعا:تستطيع أن يزداد وزنك أو ينقص(حسب حالتك)
مثال: لو كنت من نوعية الناس اللي لما يكتئبوا بياكلوا
فممكن تتخن بسهولة جدا فى الفترة دي
ولو كنت بالعكس تقدر تعمل ريجيم وتخس زي ما أنت عايز

ثامنا:تستطيع أن تكسب دعوات أكثر أيام الإمتحانات من جميع الدفعة والأقارب والجيران والبلد كلها
مثال: ما أنت مكتئب وبتمتحن وغلبان طبيعي اللى يشوفك هيدعيلك ربنا ينجحك بدل الكأبة اللى أنت فيها دي

تاسعا:تبحث أكتر عن السعادة وقد تجدها بسهولة اكثر
مثال:ما أنت طول ما أنت مكتئب بتحاول تخرج من الحالة دي وتفرح
بالتالي إحتمالات أنك تلاقى فعلا حاجة مفرحة أكتر
لكن الشخص الفرحان أصلا ما هو كده كده فرحان أكيد مش هيدور على حاجة تسعده :D


أعتقد كل دي مميزات تدعونا أن احنا نكتئب أكتر وأكتر
وأكيد كمان فيه مميزات تانية بس أنا نسيتهم
وطبعا بأرحب بأى إضافات :D
سلام