الخميس، 21 أغسطس، 2008

كوابيس

كوابيس كوابيس كوابيس

الكوابيس والأحلام تعتبر من الحاجات الغريبة واللى ملهاش تفسير منطقي عن كيفية حدوثها أو ايه الجزء اللى فى دماغنا اللى بيخلينا نحلم؟ محدش يعرف
ومن المعروف يعني أن الأحلام بتعبر عن شخصية الإنسان وعن أمنياته وطريقة تفكيره بدون ما يبقي فيه حدود لكل ده لأن محدش غيره بيشوف أحلامه وبالتالى بيقدر يعمل اللى هو عايزه
يعنى مثلا أنا شخصيا من النوع اللى بأحلم سواء حلم حقيقي أو حلم زى ما بيتقال حلم يقظة أني بأعمل كل الحاجات اللى مابقدرش أعملها فى الحقيقة -أو اللى طبيعتي بتمنعني من أني أعملها -كطريقة مني عشان أخرج الضغط النفسي اللى بينتج
عن عدم قدرتي على فعل الحاجات دي
ايه كل التحاليل النفسية دى؟؟ مش عارفة والله
الموضوع بقي اللى عايزة أتكلم فيه هو أن تقريبا معظم الناس عندها كابوس معين من زمان قوى من أيام الطفولة كابوس بيقدر يخليك تصحى من النوم مخضوض زى أى طفل صغير
حاجة غريبة فعلا أنك يبقي عندك كابوس كده معين دايما بتحلم بيه مش لازم كل يوم أو كل شهر بس بتبقي كل مدة كده تلاقيك حلمت نفس الكابوس وصحيت بنفس الخضة
أنا مش عارفة اذا كان كل الناس كده ولا أنا بس اللى كده ولا ايه ظروفكم عشان كده قلت أسأل وأشوف الناس كوابيسها ايه وبتعبر عن ايه الكوابيس دى
أنا عامة الكابوس بتاعي تقريبا يعنى بيعبر عن خوفي الدائم من أني أتحط فى موقف أبقي عاجزة فيه عن اتخاذ أى قرار أو أبقي عاجزة عن أني أحل المشكلة اللى أنا فيها
لأن كابوسي بيبقي دايما أني بأهرب من حد أو وحش عجيب وبعدين أفقد القدرة على الحركة تماما بأبقي عايزة أجري بس رجليا مابستمعش كلامي وتنفذ الأمر وتجري وأحاول أصرخ بس مفيش صوت بيطلع مني وبأبقي عاجزة تماما عن أني أعمل أى حاجة
كابوس وحش قوى بالنسبة ليا وبأحلم بيه من وأنا صغيرة من أول ما وعيت على الدنيا زى ما بيقولوا وفعلا هو بيعبر عن عقدة من عقدي الكتيرة :D
يا ترى لو أنتوا كده فعلا ايه هى الكوابيس بتاعتكم ؟؟؟؟
سؤال يطرح نفسه :D
عايزة كده كل واحد يدخل يقول بشجاعة كده ويحكى وإن شاء الله أحاول أعمل نفسي دكتورة نفساوية وأحللكم زى ما حللت نفسي التحليل الغريب ده ونشوف عقد الناس ايه عشان تهون على كل واحد عقدته ;)
سلاااام

الاثنين، 4 أغسطس، 2008

حكاية عادية جدا

حكاية فراق
ليه كل ما أقول هأفرح تيجي حاجة كده من ورا ضهرى وتخليني أحزن
والغريب حزني بيبقي أكبر من أى حزن عادى
لأن كان نفسي فرحتي تكمل وكان نفسي حلمى يلحق يكبر
ليه كل شوية حد يبعد وأقول خلاص ما هو مكتوب ومقدر
بس برضه أرجع أحزن لما أشوف حد تانى جاى يبعد
ما هو أصله مش عادى فى يوم واتنين وتلاتة
أبص الاقي كل الناس حواليا بتبعد
اللى يسافر واللى يتغرب واللى يروح ويبعد
وأبص فجأة الاقي البيت بيفضى من عيلة
تفضل بنت وأم حنونة
ويفضل حزن كبير معاهم
حزن على أيام جميلة
كلها عدت وجه بعدها ليالى طويلة
وبيت فجأة بقي واسع علينا
ولمة تاهت وسط دنيا كبيرة
ما هو لازم كده دايما
يجي الفراق فجأة
ونبص نلاقى الناس بتبعد
والأحلام بتروح وتنسى
تنسى واحدة كانت بتحلم
واحدة كان نفسها تفضل
طفلة صغيرة فى وسط بيت ولمة وصحبة حلوة
بس الأيام ما بتديش من غير ما تاخد
والدنيا ما بتفرحش من غير ما تحزن
أصل مفيش فرحة من غير حزن
ولا فيه ضحك من غير دموع
ولا فيه دنيا من غير جروح
ونرجع تانى نقول كله مكتوب ومقدر
مكتوبلنا حزن وفراق من غير سبب
مكتوب فى وسط البحر تيجي موجة عالية قوى
تضربك على ضهرك بالقوى
وتاخدك وترميك على الشط
شط مفيش عليه حد
شط فيه أنت وبس
وشوية حزن
وشوية ذكريات
ذكريات ناس كانوا معاك هناك
بس الدنيا فرقتكم عن بعضكم
وفضلت أنت قاعد هناك
بتفتكر فى لمة زمان
وتفتكر أحزان زمان
وضحك زمان ولعب زمان
صحيح كان البيت صغير
بس كان فيه أمان
وكان ليك اللى يسأل عليك فى مرضك
ويمسح من على خدودك دمعك
وأخ يسمعلك
وأخ كمان فيه كتير منك
وأب يقف جمبك ويساعدك
صحيح فاضلك أم معاك
تقدر فى البرد تدفيك
ومن شرورك تحميك
وتبعد عنك رعبك
وتشيل معاك همك
بس برضه حزنك هو حزنك
وهتشيل معاها حزن تانى وجرح تانى ما هى برضه أمك
والفرقة مالهاش نهاية
ده هى دى البداية
كل واحد وله سكته وطريقه
وكل طريق ماشى بعيد
وخلاص البيت اللى فضى عمره ما هيرجع
أصل الماضى عمره ما بيرجع
والفراق ده مش هيجي من بعده لقاء
بس هى الدنيا كده
دايما تبدأ بطريق واحد
وتنتهى بأكتر من طريق
وكل طريق وله حكاية
ونرجع تانى ونقول كله مكتوب ومقدر
مكتوب دايما نفترق