الخميس، 9 سبتمبر 2010

عيد مع "سعد نبيهة"



كل سنة وأنتوا طيبين
العيد جه
طبعا مستغربين العنوان
هشرح أهوو
كلنا عارفين أكيد أغنية "العيد فررحة هييه هيييه وأجمل فررحة هيييه هييييه سعدنا بيها بيخليها "
والي آخر الأغنية بقي

تقريبا تلت اربع اطفال كانوا بيسمعوا حتة سعدنا بيها غلط كنا كأطفال بريئة بنسمعها سعد نبيهة وكأنه شخص معين
وأكيد الأطفال الذكية كانوا بيتسائلوا مين هو سعد نبيهة اللى العيد مش هيبقي عيد ونفرح من غير وجوده ده
طبعا الحكاية دي تعتبر من الطرائف والنوادر بتاعتنا وأحنا أطفال :D
بس أنا بقي فكرت واكتشفت أن فعلا سعد نبيهة ده مهم جداا عشان العيد يبقي مفرح
بس سعد نبيهة مش شخص معين لأ ده متغير -ومتغير Private كمان :D -
بالنسبة لكل شخص فينا فأحنا فعلا بنحتاج للأستاذ سعد نبيهة عشان نقدر نفرح بجد فى العيد
سعد نبيهة بتاعك ممكن يكون شخص معين لو مش معاك فى العيد مش هتفرح
سعد نبيهة ممكن يكون حاجة نفسك قوي أنها تحصل عشان تفرح بالعيد
سعد نبيهة ممكن يكون إحساس نفسك تحسه عشان برضه تقدر تفرح قوي
وكل واحد مننا محتاج كده يقعد يفكر ويشوف مين هو "سعد نبيهة" بتاعه ويحاول يوصل له
لو كان شخص يكلمه أو يروحله
لو كان حاجة نفسه تحصل يروح ويحاول يعملها
لو كان إحساس يحاول يشوف ازاى ممكن يحسه ويحسه فعلا
عشان كلنا نقدر نفرح فى العيد ده
ولذلك من موقعي هذا بعمل دعوة لكل واحد فينا
"دور على سعد نبيهة بتاعك عشان تفرح"

ويا رب كلنا نفرح فى العيد ده ونفرح دائما
ونكون خرجنا من رمضان وربنا راضي عننا ومتقبل لصيامنا وقيامنا وركوعنا وسجودنا ويكتبنا من العتقاء من النار اللهم آمين
وكل سنة وأنتوا طيبين :)