الثلاثاء، 5 يناير 2010

تفائل....ابتسم...... طب وبعدين؟؟؟

السلام عليكم ورحمة الله وبركاته

بعد شوط طويل بيني وبين نظريات وجمل التنمية البشرية والتفاؤل واضحك للدنيا وابتسم وكل حاجة -سبحان الله- هتبقي حلوة من غير حتي ما يقولك إن شاء الله
قررت أني مش لازم أسكت :D
بجد الحاجات دي أنا مش قادرة أقتنع بيها خالص
يعني ايه اللى هيحصل لو ابتسمت فى وش مشكلة قابلتني؟؟ أو ركزت طاقات عقلي فى أنها اتحلت والحياة بقت حلوة لو أنا ما قمتش فعلا واتحركت وعملت اللى عليا عشان أحل المشكلة دي؟؟
أصل الموضوع منطقي أكتر منه تفاؤلات وابتسامات وتخيلات
قدامك مشكلة أكيد ليها حل والحل ده عشان توصله له خطوات
قوم واعمل الخطوات نجحت يبقي الحمد لله
فشلت يبقي خلاص ده نصيبك وأنت حاولت واشتغلت وعملت اللى عليك
لكن ايه بقي النظرية فى ابتسم للحياة تبتسملك؟؟
يعني مثلا لو هتحصلي مصيبة كمان شوية وأنا ابتسمت المصيبة مش هتحصل؟
رد فعلي هيختلف؟؟ مش هتصدم؟؟
لأ أكيد هتصدم واكيد هأزعل ولازم أخد وقتي فى الزعل -بس من غير ما يزيد عن حده- وبعدين أراجع نفسي وأشوف ايه اللى حصل وليه وازاى أعالج الموقف وأخرج منه
ماشى ممكن الواحد يبتسم ويضحك ويتفائل بس ماينفعش يحط فى دماغه أنه لما يعمل كده الحياة هتبقي أحلي
أو ده هيسهل الوصول لأى حاجة هو نفسه فيها
لأ ده مش هيجيب نتيجة بس الشغل والخطوات الإيجابية هي اللى تقدر توصلك أو على الأقل تسعدك بجد مش مجرد ابتسامة عريضة وخلاص لأ هتبقي سعادة داخلية انك حاولت واتحركت
وبعدين الواحد طبيعي أنه متوقع أن فيه مشاكل هتقابله ومصايب هتيجي فوق دماغه فلازم يقدر بس يتعلم يبقي أكثر مرونة فى التعامل مع الصدمة الأولي لأى حاجة وحشة ممكن تحصل
ولا يبتسم ولا يتفائل ولا أى حاجة الموضوع مش محتاج غير شوية عقل وتفكير منطقي مع رضا بقضاء الله والعمل المنطقي عشان نخرج من الظروف الوحشة دي بس خلصت الحكاية
آه ده مش معناه أسود الدنيا فى وشي لأ أمشى حياتي عادي وإن شاء الله خير بس مايبقاش ده محور حياتي كلها يعني الحكاية مش محتاجة كلام كتير ولا تفاؤل ولا إبتسامة ولا أى حاجة من وجهة نظري بالعكس الحاجات دي ممكن تأثر سلبا لو مجابتش نتيجة
يعني الواحد لو تفائل قوي بشأن حاجة معينة -حلوة بشأن دي :)- أو فضل يحلم كتير بأنه حقق حلم معين وما حصلش هيضايق أكتر
يبقي ليه أتعب نفسي وأحلم وأفضل أتخيل أن الحلم اتحقق واتفائل وابتسم من قبل حتي ما اخد الخطوات اللى هتساعدني فى الوصول لحلمي ؟؟

يمكن وجهة نظري دي كلها عشان النصايح دي عمرها ما نفعت معايا ولا جابت أى نتيجة وممكن عشان وجهة نظري صح والكلام ده ملوش لازمة أصلا مش عارفة الحقيقة فين.......
أنتوا ايه رأيكم؟؟
نجحت معاكم النصائح دي قبل كده؟؟؟
مقتنعين فعلا بالنظريات دي؟؟؟
أنا عن نفسي بأحس بالخطر لما أبدا اتفائل الأيام دي
بس أحنا بدأنا فى سنة جديدة وإن شاء الله خير وتبقي سنة حلوة علينا ومفرحة
وتبقي ذكرياتها جميلة عشان نفتكرها بالخير
سنة التخرج بتاعتنا بإذن الله وبداية جديدة لينا كلنا :)
كل سنة وأنتوا طيبين
سلااااااااام

هناك 10 تعليقات:

senioreta يقول...

جميل اوى الموضوع يا سارة
بجد موضوع الابتسامة والتفاؤل مبيمشيش معايا انا كمان
انا مش بتفائل انا دائما متشائمة
مش معنى كدة انى بعقد الامور او كدة
لا بس انا بفكر بعقلى قبل اى حاجة

واكتشفت كتير انى لو فكرت ببساطة وعملت حاجة قبل مفكر فى عواقبها او تفائلت بالنسبة لرد الفعل بتقلب ضدى وبندم على الخطوة دى

وبقيت بفترض اسوأ رد فعل وامشى علية
وبعدين لو حصل العكس يبقى خير
شكرا على البوست :D

M.M.F يقول...

أتفق معاكى فى موضوع ان الابتسامة و التفائل والكلام ده من غير تنفيذ ولا ليه لزمة.

هى بس الفكرة أن الواحد يعيش فى الموود :)

اعتقد انك شفتى فيلم
The Law Of Attraction

بس هو الواحد بس بيتفائل من باب
" تفائلوا بالخير تجدوه "

كمان التفائل و الابتسامة حلوين :)
يعنى حتى لو معملتش حاجة او متحققش حاجة كفاية اللحظات الحلوة اللى عشتها و طبعا مش هزعل ان الشى محصلش لانى معملتش حاجة :)

و طالما عايشين يبقى نعيش حياة سعيدة و نضحك و نتفائل دايما :)

تقبلى مرورى,
سلام عليكم

غير معرف يقول...

سوري انا مقراتش الموضوع كله بس فهمت المضمون من اول فقره

ببساطه لما الواحد يتفائل وهو بيشتغل هينجز شغله افضل من وهو مكتئب من المشكلة ومركز ازاي هتتحل في ظل الظروف والارف والعكننه والنيله المنيله بنيله ( مش عارف شوف الكلمة دي فين بس حلوة :D ) وما الي ذلك ،، لكن لو ركز ان المشكلة دي ليها حل فعلا وبدأ يشتغل ومفكرش في المشكلة كتير وبدا يركز في ازاي يحلها وهو مقبل علي انو يحلها بدون ما يعكنن مزاجه ،، فـ إشطه

هو اه دا كلام تنميه بشريه زي ما قولتي نعرفه من زمان ،، بس خلينا نحاول نعمل بيه وربنا ييسر

سلام

hend89 يقول...

ماشي كويس يا سارة
بس محدش قالك ابتسمي واقعدي اضحكي والدنيا هتبقى فلة
لا طبعا
احنا بنقول ابتسمي عشان تقدري تتعايشى وتفكري صح في حل مشكلتك
ومحدش قال ان لو ابتسمتي المصيبة مش هتقع
لا هتقع بس هيكون صدمتها اقل
لأنك مش مكتئبة ومؤمنة بقدرك
وبالتالي برضه هتقدري تتخلصي منها بصدر رحب
ولو قارنتي واحد مكتئب وبيفكر في حل مشكلة
وواحد تاني واخد الأمور ببساطة شوية وبيفكر في حل نفس المشكلة
الانسان اللي نفسيته أحلى هيجيب نتايج أفضل بلا شك لأن مفيش عليه ضغوط بتعوقه عن التفكير

ومش هقولك تفائلو بالخير تجدوه عشان انتي أكيد عارفة :)

senioreta يقول...

ايوة فعلا كل الكلام دة جميل
بس المقصود بالكلام على حد منا فهمت ورديت
ان احنا منبتسمش للحياة ومنعملش حاجة
يعنى انا لو ابتسمت وقلت الموضوع هيعدى مش هفكر واحلة
ولو قعدت اتخيل ان الموضوع اتحل وتفاءلت مش هفكر فى ان الحل صعب واحاول معاة واجتهد و مع اول موقف يوصلنى لطريق مسدود هرجع ازعل تانى واتشاءم تانى

ومش مقصود بالتشاؤم هنا اننا نقعد نعيط ونفشل لا اننا نفكر بجد ونحط فى دماغنا ان الموضوع مش هزار ومش هيتحل الا اذا ركزت فية

وزى مسارة قالت دة منطقى اكتر مإنة تخيلات

key of life يقول...

الأبتسامه لا تفيد :)
هو بالنسبالي من واقع تجاربي مع الحياه
حتى لو أنا قولت أه هندخل بتفاءل وحب علي المشاكل
أول ما بتحصل مش بيبقي تفكيري كدا خااالص D:
يلا الحمدلله
وطبعا مش هينفع نفضل سايبين المشكله وقاعدين نضحك وفي نفس الوقت برضو مينفعش نعيط لحد ما تتحل لوحدها
لازم نفكر ونلاقي حل
سلاااام

solo يقول...

والله أنا جربت الكلام ده قبل كده لما تحصل مشكلة يعنى أتفائل وأبتسم وكده بس منفعش معايا
أصل فعلا الواحد ساعتها مش بيفكر فى كل الحاجات دى غير إنه يعمل حاجة عشان المشكلة تتحل
أو يطلع من الموقف اللى هو فيه بأى شكل
بس هو مش معنى كده إننا نبقى مكتئبين باقى حياتنا أكيد فيه لحظات بتمر علينا بنبقى متفائلين فيها وحابين الحياة فيها هى أينعم بتبقى لحظات وبس
بس هى دى اللى بتخلينا قادرين نكمل بعد كده وبتعوضنا عن حاجات كتير

سلااااام

diyaa mahmoud يقول...

موضوع الابتسامه ده مش مقصور عل ان الواحد يبتسم زى العبيط لما تحصل مشكله

الفكره هنا ان عشان نفكر لازم نفكر بهدوء
ولو قولتى لحد يفكر بهدوء مش هيعرف يهدئ فهما عملو خدعه ان بدل ما اقولك فكرى بهدوء اقولك ابتسمى عشان الابتسامه بتزود هرمون معين بيهدى الاعصاب وفى المقابل لما الواحد بيفكر بعصبيه وقلق هرمون تانى بيزيد
واعتقد تسمعى عن اللى جالهم جلطه وزبحه لمجرد فقط انهم سمعو ان مشكله حصلت

بس كده

سلام

ٍSalma يقول...

ساره == اعتراض :P

ليه يابنتى واخده الموضوع قفش كده

انا عن نفسى لما بتحصلى مشكله واكتئبت وركزت فى المشكله بس ،، عمرى ما هعرف احلها اطلاقااا .

انا لازم اقنع نفسى ان الحياه سهله والمشكله دى اتفه ما يكون واحاول فيها كتير وبركز ع الحل والحمد لله كتير بوصله
وده مبدأى فى الحياه " تفائلوا خيرا تجدوه "

وياستى برده لو المشكله ما اتحلتش مش معضله يعنى اكيد برده استفدتى ودى مش اخر الدنيا اكيد فى ابواب كتير ممكن نحاول نفتحها ونستفيد

واى نجاح فى الدنيا بيبقى اوله فشل :D

والله المستعان فى الاول وفى الاخر المشكله مش بتتحل بالابتسامه ولا الاكتئاب .

بس فى مثل بيقول نص العمى ولا العمى كله

يعنى لو متفائله والمشكله متحلتش على الاقل ما تعبتش اعصابى ده نص العمى

ولو اكتئبت والمشكله برده متحلتش يبقى ده فعلا العمى كله :P

كفايه كده عليكى اللى فى جيبى خلص :P

MY FATE يقول...

منورين كلكم المدونة والله
بس زي ما سارة قالت
"ولو قعدت اتخيل ان الموضوع اتحل وتفاءلت مش هفكر فى ان الحل صعب واحاول معاة واجتهد و مع اول موقف يوصلنى لطريق مسدود هرجع ازعل تانى واتشاءم تانى

ومش مقصود بالتشاؤم هنا اننا نقعد نعيط ونفشل لا اننا نفكر بجد ونحط فى دماغنا ان الموضوع مش هزار ومش هيتحل الا اذا ركزت فية"
هى دي كانت وجهة نظري
ما اقعدش اتفائل وابتسم وافرح من قبل ما احل المشكلة
كده مش هاقدر اركز فيه بالقدر الكافي عشان أحلها صح
ماشى نتفائل وكل حاجة
بس مش لدرجة أن التفاؤل يعطلني عن الفعل
بس كده
وأنا أكيد كل اللى يعرفوني دائما مبتسمة ومعترضة :D
وفى النهاية الإختلاف شيئ مطلوب :D
أهم حاجة ربنا يكرمنا كلنا بكرة فى الإمتحانين اللى وراناااا
وده موقف أنا شايفة أني لازم اتشائم صعب التفاؤل مع الايه اي بصراحة :(

سلااام