AOA

السلام عليكم فى الاول
ثانيا : كل سنة وأنتوا طيبين وياا رب السنة دي تبقي أفضل واكيييد تعاطفنااا مع غزة جرحنا الدااائم وربنا ينصرنااا وينصر الإسلام والمسلمين
ثالثا بقي اسم الموضوع AoA
اسم مادة عندنا هو إختصار من عندي للمادة التي يطلق عليها Analysis of Algorithms
مادة ما يعلم بيها إلا ربناا
مادة من ام دكتورين اه والله مش بأهزر ده بجد مادة بدكتورين
المادة دي نفسي أعرف أنا المفروض أتعامل معاها ازاى
مفيش ليها كتاب واللى عايز يعني المفروض يروح يصور مرجع كده واحد فى تحليل الخوارزميات والتاني فى ال fuzzy
هههه حد هيسأل ويقول ومين ال fuzzy دي يا اختي هأقوله أنا ده الجزء اللى الدكتور التاني شرحه لينااا
وهأقول ما علينااا
هاجي بقي للى أنا فهمته من المنهج بسم الله ما شاء الله نفسي أعرف هو المنهج عايز يقول ايه؟؟ مش فاهمة نوهااائي
أنا باعرف أحلل وكل حاجة وال master method
سارة فهمته وهأبقي أفهمه منهاا مفيش مشكلة برضه
بس بجد أنا مش فاهمة أنا عمالة كده ليه فى المادة دي؟؟
وهل كل الناس كده يعني؟؟ ولا أنا لوحدي أو أنا وأصحابي بس اللى كده
عايزة أفهم المادة راحة فين وجاية منين بس مش قادرة أوصل للحقيقة دي
وبرضه الجزء بتاع التخيل ده واني أعتمد على خبرتي فى المادة
مسخرة والله المفروض أخمن منين أنا مش عارفة والله
لو الموضوع محتاج خبرة الواحد يشيل المادة عشان ياخد خبرة على السنة الجاية بقي ولا ايه؟ مش عارفة برضه
لأ والمضحك جدااا بقي أني عندي إمتحان شفوي بكرة فى المادة دي لأ وكمان عندي إمتحان عملي يوم الخميس اللى هو بعد بكرة يعني
حاجة لوووووووز بصراحة
أنا مش عارفة أقول ايه ولا أعمل ايه فى المادة دي
بجد لينااا ربناااا ومني لربنااا برضه
ودعواتكم ليناا بكرة
هو الله أعلم الإمتحان هيبقي الساعة كام أساسا بس الإحتمال القائم أنه الساعة 11 فى الموعد الرسمي للمحاضرة يعني
يللا هأقول ايه ؟ هي دي حاسبااات تخيل
سلااام بقي

رحلة تجنن

أولا السلام عليكم

ثانيا بقي كل سنة وانتوا طيبين العيد خلص :)) بس هو النت اللى كان فاصل بقي
ثالثا بقي يوم 4-12-2008 أنا كنت فرحاااااانة (بعيدا عن بعض الحاجات اللى فى النص يعني)
وبجد مش عارفة أحكي وأقول ايه على الرحلة بس الصور بتعبر اكتر عشان تشوفوا الجو كان عامل ازاى وبالتالى تحسوا أحنا كنا حاسين بإيه الصور أهي وأكيد هي بتعبر عن مواهبي التصويرية (هما بالموبايل بتاعي فعادي يعني لو مش حلوين قوي ;) )
شايفين البحر شكله رائع ازاى؟؟؟؟

وخلي بالكم من الطائر اللى كان معدي لقطته أنا بسرعة جهمنية :)

نفس ذات الطائر (ما شاء الله عليا ;) )

لكم ان تتخيلوا بقي مزاج الواحد يبقي عامل ازاى وهو قاعد قدام المنظر ده ده طبعا غير التهييس بتاع الأصحاب و غير اللى عملناه بلليل والملاهي وعضمنا اللى اتكسر يعني فعلااا اليوم ده كان يوم مفرررررح جدااا أنا عملت البوست عشان أفتكر اليوم وعشان أختي الصغيرة كانت مستنية أني أعمل ;)
سلااام بقي

الموت في سامراء

فى قديم الزمان كان هناك رجل من بغداد يمشى فى السوق فقابله ملك الموت فنظر له باندهاش فخاف الرجل جدا وقرر السفر إلى سامراء (وهي بلدة بعيدة عن بغداد بالنسبة لهذا الوقت وطرق السفر فيه) وفعلا ركب السفينة ليسافر هناك وعندما وصل بعد يومين بأقصي سرعة ممكنة مات هناك
فقابل صديقه ملك الموت وسأله لماذا نظرت لصديقي بدهشة؟؟
فقال له ملك الموت لأنه كان من المفروض أن أخذ روحه بعد يومين فى سمراء فاستغربت وجوده فى بغداد فى هذا الوقت!!!

طبعا محدش فاهم أنا عايزة ايه؟ دي قصة خيالية هدفها الموعظة يعني
الموضوع وما فيه أن دي قصة قديمة ملخصها جملة واحدة "ما حدش عارف نهايته فين وازاى؟؟"
يعني الراجل هرب من بغداد عشان خاف يموت وهو أصلا كان مقدر له أنه يموت فى البلد اللى هرب ليها
"كالمستجير من الرمضاء بالنار" ده مثل تاني برضه أنه واحد يطلع يجري من حاجة تافهة مش مؤذية قوي ويروح لحاجة مؤذية جدا ومميتة كمان
"وأينما تكونوا يدرككم الموت وإن كنتم فى بروج مشيدة" سبحان الله
فعلا الموت ده أكبر واعظ للإنسان
من الاخر الدنيا مش مستاهلة حزن فعلااااااااا
في حالة واحدة بس المفروض الإنسان يحزن وهو لما يعصى ربنا أو حد بيحبه يعصى ربنا بس كدااااااااا
الباقى فعلا مش مستاهل خااااالص أه نتعب فيها ونعمل اللى علينا ونحلم ونحاول نحقق حلمنا بس من غير حزن على فشل أو على حاجة ضاعت
ما يمكن أنها تضيع هو دا الخير لينا أو أن المشروع اللى فشل لشخص ما أنه دا شر لأ هو خير بس هو دماغه مش مستوعبة دا هو ذكاءه أقل أنه يفهم حكمة الله سبحانه وتعالي فى الموضوع
فعلا ممكن الفشل يكون فيه خير ليك مين عارف؟؟ يمكن....... !!
ربنا يبعد عننا المصايب عامة
هو الموضوع وما فيه محاولة للنظر لنص الكوب المليان واحنا داخلين على فترة إمتحانات
ايه المشكلة لو الواحد حل وحش فى مادة
ما هو ربنا سبحانه بيقطع من هنا ويوصل من هنا
جايز أشيل مادة بس تحصل بعدها حاجة مفرحة جداا ليا وفيها الخير جايز الله أعلم مين يعرف بكرة هيحصل ايه؟؟
لو حد عارف مكنش زمانه قاعد بيقرأ الكلام دا دلوقتي دا كان زمانه بيحكم العالم كله!!
من الأخر خالص "بصوا لنص الكوباية المليان" و "كله بيقلب خير فى الأخر"

سلام بقي

سؤال كدا أو باين سؤالين أو احتمال يطلعوا تلاتة

أهلا بكل الناس اللى بتدخل هنا عندي
من قريب زى ما مكتوب فى البوست اللى فات كان عيد ميلاد صاحبتي وأختي الصغيرة سارة
فأنا قلت عيب بقي أسيب المدونة كدا لونها أسود وأحنا بنحتفل والشلة مقررة سويا أن احنا نفرح الأسبوع دا (بس مفيش كلام بالنسبة للأسبوع العالمي للإمتحانات)
فقلت بقي لازم أغيرها كدا واحط حاجة فيها أمل عشان كدا فيه سحب
وحاجة فيها أمل وفرحة عشان كدا فيه بحر تحت خالص
فإيه بقي رأيكم فى المدونة بشكلها الجديد؟؟
بصراحة أنا مش متعودة عليها خالص وكل ما أدخل أخد فترة كدا أستوعب اللى بيحصل
نرجعها أسود تاني ولا كدا أحسن؟؟؟؟؟؟
بس دا كل الموضوع وهنشوف الموافق على الكلام ده يتفضل برفع يده :D
وعايزة الناس بقي تدعي أسبوع الإمتحانات ده يعدي على خير
وعايزة أعرف برضه هل الناس بتتقبل أني أكتب خواطر ليا بالإنجليزي ولا مش بتحسها كدا؟؟؟ ولا عادي ولا ايه ظروفكم برضه :D
بس كدااا
سلاااااام

عيد ميلاد سولو

عيد ميلاد أختي الصغيرة

كمان كام دقيقة كدا هنبدأ فى يوم جديد يوم 14-11 واليوم ده هو عيد ميلااااااااااد سولو
كل سنة وأنتي طيبة يا سارة وعقبال ما أشوف كل أحلامك بتتحقق وأديكي كملتي 19 سنة عشان ندخل أسبوع الإمتحانات وأحنا كلنا مكملين ال 19 سنة :D
طبعا حكاية أختي الصغيرة دي نوعا ما سببها تقريبا كدا عقدة عندي عشان مليش أخوات :D
والاحتمال الأكبر أن سارة بتخلي الواحد نفسه يعملها كل اللى عايزاه عشان هى أطيب من أني أقولها لأ أصلا
سارة بجد شخصية من أطيب الناس اللى فى العالم كله
طيبة وعسولة ومن النوع اللى يتحب بسرعة وفعلا ما ينفعش نرفضلها طلب ودا غير أن اسمها على اسمي :D
بس للأسف الواحد فات منه سنة وأنا مكنتش قريبة منها بما فيه الكفاية (زي الأيام دي لزقين فى بعض :D )
ده غير أن سارة ليها معايا ذكريات كتيرة جدااااااااا
منها "منك لربنا" هههههههههههه وكتير بقي من أول أيام الإمتحانات إلي تهييس ما بعد الإمتحان وأكيد أحلي رحلة (وإن شاء الله الرحلة اللى جاية كمان) وأهم حاجة نخلي عندنا أمل :D
بجد أنا فرحانة جداااااااا أن النهاردة عيد ميلادهااا
وفعلا يا سارة أنا فرحانة جدا أني اتعرفت عليكي
الواحد بيحس براحة كبيرة جدااااااا وهو معاكي ومع باقى الشلة بتاعتنا
وكمان أنا بأحس أن ليا ناس أحكيلها وأفضفض معاها بالحاجات اللى بتضايقني حد يساعدني لما أقع فى مشكلة حد يهيس معايا ويزعل معايا برضه
مليش غيركم أحكيله ماما مش جابت ليا أخوات بنات خااالص :) هما أخواتي الأتنين الولاد ودول أكبر مني بقي هما شغالين بس أكيد فيه فرق :D
بس ربنا عوضني بيكي وبباقى الشلة وبشوية قرايب مهمين :D
ربنا يخليكم ليااااااا
وكل سنة وأنتي طيبة يا أختي يا صغيرة :D

I'm LOST

I'm LOST

Have you ever had this feeling
the feeling you want something
and you don't want it to happen
at the same time?
the feeling that your are lost in the middle of your thoughts
lost in the middle of your dreams?
lost in the middle of all the things you want to do??
the feeling you want something so much
and waiting for it to happen
and in the same time you keep telling yourself
that it will not happen?
as if you don't want to give yourself the chance
just the chance to have that little dream
the dream that it might really happens??!
the feeling that you want to stop thinking
just stop thinking for a moment
not having anything to think of?
as if your mind is so clear
like the sky after raining
but you can't do it
your mind always has something to think about
as if it is a rough ocean
an ocean without any shores!
and then you start to think
how can i stop thinking!
you are thinking about not thinking!!!!
then you find yourself smiling
and telling yourself that you are crazy
then your smile begins to fade
and sadness comes to set next to you
as a loyal friend
but you think to yourself
there isn't anything worth crying for
perhaps death deserves
the death of the pepole you love
but there isn't anything else deserves crying for
so you look to the sky
keep wishing to find some hope
a little hope to give you strength
strength to keep going on with your life
strength to wake up in the morning
wake up with that hope
hope that you can make a change
a big change in your life
and stop thinking in that day for only one moment
that is all i need
at least for now :D

salam
8-10-2008

حلوة بلادي

حلوة بلادي دى أغنية قديمة كده لوردة تقريبا
ما علينا من الأغنية ده مجرد إقتباس للاسم بتاعها لأسباب تانية هتكلم فيها اهو
السؤال اللى بيطرح نفسه حاليا هو هى بلادي حلوة فعلا؟؟؟
أنا هأرد كده وبكل شجاعة وأقول أيوة بلادي حلووووووة بس كبلد يعنى كأرض كنيل كسماء كسحاب كذكريات موجودة فيها كل ده بيخلى البلد حلوة
نيجي لسؤال تاني بقي هل بلادي -كحاجات تانية غير اللى قلتها- حلوة؟؟؟
حاجات زي ايه يعني؟؟ حاجات زى الشعب الحكومة التقدم وما إلى ذلك
أكيد من الصعب كده أو بمعنى أصح من العبط أن الواحد يقول أيوة حلوة
حلوة مين يا عم الحاج؟؟؟
الشعب هنخليه للأخر
نيجي للحكومة اللى هى المفروض أصلا من الشعب بس أنا مش شايفة أنها بتعمل حاجة مفيدة للبلد يعنى البلد زى ما هي من ساعة ما حاربنا وسيناء رجعت تاني لينا بس مع ذلك وبالرغم من حالة السلام دي مصر لم تتقدم ممكن تقدمت لورا بس لقدام مفيش أى تقدم احنا من دول العالم الثالث ومرتبين كويس فى حاجات زى أن مصر فيها أفشل نظام حكومي وكمان عندك أن مصر مفيهاش انتخابات حرة ولا فيها حرية كافية أن الناس ترفض ده وخدك عندك كمان أن مصر بتتسرق يوميا وخد عندك أن معدلات الفقر بتزيد وأن الأسعار بتغلى كل يوم أكتر من اليوم اللى كان قبله وخد كتير كمان لو عايز
طيب وبعدين يعنى؟؟؟؟؟؟؟؟؟ ما احنا عارفين كل ده بس السؤال بقى الأهم من ده كله هو الشعب اللذيذ بتاعنا المفروض يعمل ايه؟؟؟
أولا المفروض يعمل ثورة على أى حاجة مش عاجبة سيادته
فيه ناس هتقول أن مفيش مساحة حرية لكده
ماشى هو فعلا مفيش بس هل الحكومة تقدر تحبس الشعب كله؟؟؟؟؟ تقدر تسكت الشعب كله؟؟ تقدر تموت الشعب كله؟؟؟
أصل يعنى مفيش حكومة من غير شعب مفيش رئيس من غير ناس يحكمها ولا ايه؟؟ يبقي أكيد مش هيقدروا يحبسوا الشعب كله ولا ايه؟؟
ثانيا حاجات مهمة لازم تتصلح فى البلد هتقولوا زي ايه؟؟
هأقول أهم حاجة النظام الغريب اللى ماشى فى المصالح الحكومية كله يتحرق زى مجلس الشورى ما اتحرق يعني
مش هينفع البلد تفضل ماشى بنظام فوت علينا بكرة والحاجات المعقدة اللى الواحد بيعملها عشان يخلص أى مصلحة له فى أى مكان حكومي فى البلد ونظام الرشاوى هيروح لوحده أصلا لما يبقي فيه نظام صح
وأن لو فيه مثلا واحد حاول يطلب منك رشوة تبلغ عنه ويروح فى داهية بعيد عننا والشغل بتاع اللى بلغ يمشى ويكمل
وأصلا لو البلد بتنتج كويس يبقي الناس مرتباتها هتبقي أفضل يبقي المفروض محدش يطلب رشوة أصلا
وبعدين بقي ايه تاني حاجة المفروض تتصلح
أكيد أكيد التعليم عشان لما الناس تتعلم صح تقدر تبدع تقدر تنتج تقدر تفيد البلد وتقدر تتقدم
يعنى مثلا مش منطقي أن حد يخرج من ثانوية عامة وهو لسه بيغلط فى الانجليزى ومش عارفة يكتب صح
ده ملوش اسم عندي غير أن البلد دي فى الضيااااااااااااااااع
يعنى مثلا تصور كده حد فى جامعة وبيدرس بالانجليزى أصلا وبيكتب جمل غلط وبيغلط فى مبادئ مفيش طفل متعلم صح هيغلطها يعنى لما حد يكتب جملة زى دي Admire with the post ما شاء الله يعني بجد تفوق أو مثلا حد يكتب حاجة كده I'm cry يا سلااااااااااااااام ما شاء الله يعني منتهى التفوق والله
من وجهة نظري دي حاجة تجيب شلل مش ليا لأ للبلد كلهاااااااا يعنى لما تبقي دي نهاية ناس فضلت تدرس لحد ما خلصت ثانوية عامة ودخلت جامعة يبقي فعلا واضح أن فيه مصيبة فى التعليم الحالي الموجود عندنا
وفيه حاجات كتيرة المفروض تتصلح غير دول بس من وجهة نظري دول أهم اتنين لازم نبدأ بيهم
وطبعا الشعب أكيد هو اللى لازم يعمل كل الحاجات اللى فوق بس أول حاجة عشان يعمل ده كله لازم يكون شعب فايق كده وصاحي وواعي للى بيحصل حواليه عنده قابلية أنه لما يغلط وحد يجي يصحح له خطأه ده يبقي عنده القدرة على أنه يتقبل الموضوع ده ويبدأ يطور من نفسه مش يفضل سايب الغلط كعند أو ربما غباء مش عارفة بس المفروض يتحرك ويشوف ايه المشكلة عنده ويحلها هو مش ذكاء مثلا لما تيجي تنصح واحد أنه ياخد الموضوع هزار أو تأليس عليك حتى مش من أخلاق دينا أن الواحد يعمل كده المفروض نتحرك مش نفضل واقفين محلك سر زى ما كان بيتقال فى فيلم عربي قديم ده كان اسمه الناس اللى فوق فأكيد ده مش من الذكاء بالعكس ده هيبقي تخلف أكتر ما البلد متخلفة أصلا
فعلاااا بلدنا واقفة محلك سر ولازم تبدأ تتحرك بقي
السؤال دلوقتى بقي : هل أنتوا شايفين أن بلدنا حلوة؟؟؟؟؟
" حلوة بلادي السمرا بلادي الحرة بلادي "
لو حد بقي معترض على حاجة قلتها يدخل ويفهمني وأنا عندي قابلية أنى أتعلم وأعرف أكتر أصل فعلا بلدي بقت بتصعب عليا من حالها وبيصعب عليا أكتر أن شعبها ساكت للدرجة دي
سلاااام

كوابيس

كوابيس كوابيس كوابيس

الكوابيس والأحلام تعتبر من الحاجات الغريبة واللى ملهاش تفسير منطقي عن كيفية حدوثها أو ايه الجزء اللى فى دماغنا اللى بيخلينا نحلم؟ محدش يعرف
ومن المعروف يعني أن الأحلام بتعبر عن شخصية الإنسان وعن أمنياته وطريقة تفكيره بدون ما يبقي فيه حدود لكل ده لأن محدش غيره بيشوف أحلامه وبالتالى بيقدر يعمل اللى هو عايزه
يعنى مثلا أنا شخصيا من النوع اللى بأحلم سواء حلم حقيقي أو حلم زى ما بيتقال حلم يقظة أني بأعمل كل الحاجات اللى مابقدرش أعملها فى الحقيقة -أو اللى طبيعتي بتمنعني من أني أعملها -كطريقة مني عشان أخرج الضغط النفسي اللى بينتج
عن عدم قدرتي على فعل الحاجات دي
ايه كل التحاليل النفسية دى؟؟ مش عارفة والله
الموضوع بقي اللى عايزة أتكلم فيه هو أن تقريبا معظم الناس عندها كابوس معين من زمان قوى من أيام الطفولة كابوس بيقدر يخليك تصحى من النوم مخضوض زى أى طفل صغير
حاجة غريبة فعلا أنك يبقي عندك كابوس كده معين دايما بتحلم بيه مش لازم كل يوم أو كل شهر بس بتبقي كل مدة كده تلاقيك حلمت نفس الكابوس وصحيت بنفس الخضة
أنا مش عارفة اذا كان كل الناس كده ولا أنا بس اللى كده ولا ايه ظروفكم عشان كده قلت أسأل وأشوف الناس كوابيسها ايه وبتعبر عن ايه الكوابيس دى
أنا عامة الكابوس بتاعي تقريبا يعنى بيعبر عن خوفي الدائم من أني أتحط فى موقف أبقي عاجزة فيه عن اتخاذ أى قرار أو أبقي عاجزة عن أني أحل المشكلة اللى أنا فيها
لأن كابوسي بيبقي دايما أني بأهرب من حد أو وحش عجيب وبعدين أفقد القدرة على الحركة تماما بأبقي عايزة أجري بس رجليا مابستمعش كلامي وتنفذ الأمر وتجري وأحاول أصرخ بس مفيش صوت بيطلع مني وبأبقي عاجزة تماما عن أني أعمل أى حاجة
كابوس وحش قوى بالنسبة ليا وبأحلم بيه من وأنا صغيرة من أول ما وعيت على الدنيا زى ما بيقولوا وفعلا هو بيعبر عن عقدة من عقدي الكتيرة :D
يا ترى لو أنتوا كده فعلا ايه هى الكوابيس بتاعتكم ؟؟؟؟
سؤال يطرح نفسه :D
عايزة كده كل واحد يدخل يقول بشجاعة كده ويحكى وإن شاء الله أحاول أعمل نفسي دكتورة نفساوية وأحللكم زى ما حللت نفسي التحليل الغريب ده ونشوف عقد الناس ايه عشان تهون على كل واحد عقدته ;)
سلاااام

حكاية عادية جدا

حكاية فراق
ليه كل ما أقول هأفرح تيجي حاجة كده من ورا ضهرى وتخليني أحزن
والغريب حزني بيبقي أكبر من أى حزن عادى
لأن كان نفسي فرحتي تكمل وكان نفسي حلمى يلحق يكبر
ليه كل شوية حد يبعد وأقول خلاص ما هو مكتوب ومقدر
بس برضه أرجع أحزن لما أشوف حد تانى جاى يبعد
ما هو أصله مش عادى فى يوم واتنين وتلاتة
أبص الاقي كل الناس حواليا بتبعد
اللى يسافر واللى يتغرب واللى يروح ويبعد
وأبص فجأة الاقي البيت بيفضى من عيلة
تفضل بنت وأم حنونة
ويفضل حزن كبير معاهم
حزن على أيام جميلة
كلها عدت وجه بعدها ليالى طويلة
وبيت فجأة بقي واسع علينا
ولمة تاهت وسط دنيا كبيرة
ما هو لازم كده دايما
يجي الفراق فجأة
ونبص نلاقى الناس بتبعد
والأحلام بتروح وتنسى
تنسى واحدة كانت بتحلم
واحدة كان نفسها تفضل
طفلة صغيرة فى وسط بيت ولمة وصحبة حلوة
بس الأيام ما بتديش من غير ما تاخد
والدنيا ما بتفرحش من غير ما تحزن
أصل مفيش فرحة من غير حزن
ولا فيه ضحك من غير دموع
ولا فيه دنيا من غير جروح
ونرجع تانى نقول كله مكتوب ومقدر
مكتوبلنا حزن وفراق من غير سبب
مكتوب فى وسط البحر تيجي موجة عالية قوى
تضربك على ضهرك بالقوى
وتاخدك وترميك على الشط
شط مفيش عليه حد
شط فيه أنت وبس
وشوية حزن
وشوية ذكريات
ذكريات ناس كانوا معاك هناك
بس الدنيا فرقتكم عن بعضكم
وفضلت أنت قاعد هناك
بتفتكر فى لمة زمان
وتفتكر أحزان زمان
وضحك زمان ولعب زمان
صحيح كان البيت صغير
بس كان فيه أمان
وكان ليك اللى يسأل عليك فى مرضك
ويمسح من على خدودك دمعك
وأخ يسمعلك
وأخ كمان فيه كتير منك
وأب يقف جمبك ويساعدك
صحيح فاضلك أم معاك
تقدر فى البرد تدفيك
ومن شرورك تحميك
وتبعد عنك رعبك
وتشيل معاك همك
بس برضه حزنك هو حزنك
وهتشيل معاها حزن تانى وجرح تانى ما هى برضه أمك
والفرقة مالهاش نهاية
ده هى دى البداية
كل واحد وله سكته وطريقه
وكل طريق ماشى بعيد
وخلاص البيت اللى فضى عمره ما هيرجع
أصل الماضى عمره ما بيرجع
والفراق ده مش هيجي من بعده لقاء
بس هى الدنيا كده
دايما تبدأ بطريق واحد
وتنتهى بأكتر من طريق
وكل طريق وله حكاية
ونرجع تانى ونقول كله مكتوب ومقدر
مكتوب دايما نفترق

كان الزمان

ذكريات

ذكريات ذكريات ذكريات
هذه حياة كغيرها ملئية بالذكريات
ذكريات طفلة صغيرة تجرى وتلعب هنا وهناك
ذكريات طفلة تقف فى الشباك تأكل حبيبات الذرة التى تفرطها لها أمها
وتبتسم وتضحك وتجرى وتلعب هناك
تلعب الاستغماية وتلعب الاولى والسبع طوبات
طفلة صغيرة تجرى وتلعب فى الرمال وأمامها البحر الواسع
جميل البحر بالنسبة لها بنفس مقدار ما هو مخيف وغامض
تجلس هناك أمام البحر ووالدها يحفظها ايات وايات الاخلاص والتوحيد والمعوذتين
ذكريات طفلة صغيرة وجدها يلعب معاها ويدغدغها هى وأخوها
طفلة صغيرة هى وكم تمنت أن تبقي الحياة هكذا
ذكريات طفلة صغيرة انتقلت لتعيش هناك
وتلعب مرة اخرى هناك وتركب الدراجة وتجرى فى الشوارع
لا تتذكر مرة بكت فيها أو شعرت بالحزن
طفلة هي ولكن الزمن لا يتوقف
كبرت تلك الطفلة
ما عدا هناك شارع أو لعب أو جرى
كم اشتاقت الجرى هذه الطفلة
تنظر لصورة هذا الحصان وتتمني أن تجرى مثله
كم اشتاقت دراجتها الصغيرة وضحكاتها وشعرها القصير المتطاير
كانت طفلة هى ولكن الزمن لا يثبت
ذكريات صبية صغيرة
والمدرسة وأستاذها الوسيم
وذكريات أصدقاء صغار هناك فى المدرسة
وذكريات صبية تذهب للدرس
ترى هذا الصبي ويتبادلوا البسمات
ذكريات صبية وصبي فى هذا الدرس
وعلى الحائط هناك رسم قلب لها ووضع أول حرفين من أسماءهم
هناك على الحائط بجوار الدرس
كانت صبية ولكن العمر يمر
ذكريات شابة فى مقتبل حياتها
محبوس بداخها رغبات ورغبات
رغبة فى الجرى
رغبة فى اللعب
رغبة فى ركوب دراجتها
رغبة فى البكاء حنينا لتلك الطفلة التى كانت يوما ما هي
رغبة ورغبة ورغبة
وذكريات
ذكرياتها وهى فى الثانوية
دروس ومدرسة كتب ومذكرات
امتحانات وخوف وقلق ونتيجة
ذكريات أيام مضت
وأحلام بعمر قادم
ذكرياتها فى أول يوم لها فى الجامعة
خوف ووحدة
تمشى مع صديقتها وتخطو خطوات قلقة من المستقبل الذى سيستقبلها وحيدة
تمشى داخل هذا العالم الواسع وتشعر بالخوف
تقابل هناك زملاء
زملاء ولكن سرعان ما يصبحوا أفضل الأصدقاء
وسرعان ما تعتاد هذه الشابة على هذا العالم الواسع
وتحبه ويصبح عالمها الخاص
يحتوى على أحلامها
على كليتها الحبيبة
وأصدقائها وأحلامهم الصغيرة
وضحكاتهم وكلامهم ومشاعرهم
وخوف ليلة الامتحان وفرحة بعده وربما حزن واكتئاب
ذكريات وذكريات وذكريات
ذكرياتهم هناك
ذكريات ضحك ومذاكرة ومحاضرات وسكاشن وهذا الكشكول الذى يحتوى على كل هذا
يحتوى على أحلامهم وضحكهم وحتى برنامجهم الصغير
يحتوى على أحزانهم وبكائهم يحتوى على وجوههم وحالاتهم المتغيرة
أصدقائها الأربعة هناك وحلمها هناك يحبو وتحاول الاعتناء به
شابة هى تحمل بداخلها هذه الطفلة
الطفلة التى تجرى وتلعب وتبتسم هناك
تحمل بداخلها حنينها للماضى
وتحمل خوفها وقلقها من المستقبل
طفلة هي وستبقي هكذا مهما مر من الزمن عليها
طفلة هى وهذه ذكريات طفلة

IT Is My BirthDay Today

(عيد ميلاد الليلة مين؟؟ عيد ميلاد النونة
هنفرح ست الحلوين ونشيلها فى عيونا)
طبعا الأغنية دى مش ليا أنا دى لسلمى بنت عمي لأنها هى كمان عيد ميلادها النهاردة
يوم الخميس الموافق 10-7-2008 أنا للأسف كبرت سنة وكملت ال 19 سنة بحااااااااالهم (الواحد عايش بقاله كتير قوى كده ليه؟؟) وسلمى هتكمل 5 سنين طبعا هى من الأول الأسبوع وأنا بصراحة بأعترف أنى بوظتها من كتر الدلع
كل ما حد يعمل فيها حاجة أقوله عيب كده ده عيد ميلادها قرب هنزعلها ازاى؟؟
وبعدين كل شوية أسألها عيد ميلاااااااد مين قررررررب؟؟؟؟
تقولي أنا وأنتي يقوم محمد أخويا داخل فى النص ويقول وأنا كمان ده أنا حتى عيد ميلادى قبلكم بس احنا نقوله لأ احنا عيد ميلادنا فى نفس ذات اليوم
هو أينعم يوم 5-7 عدى بقاله 5 أيام بس أنا هأقول على الملأ كل سنة وأنت طيب يا محمد والله وكبرت وعشت وشفت أخويا الكبير لحد ما بقي عنده 24 سنة بحالهم لأ وكمان احتمال أعيش وأشوفك بتتخرج السنة دي
وبالمرة بقي عشان سيرة الأسرة دى كلها هأقول لأخويا التانى بقي مصطفي
ألف مبرووووووووووووووووووووووووووووووووووووووووك التخرج يا مصطفي (بقولهالك مقدما أهو وأنت لسه هتتخرج يوم السبت الجاى)
يا سلاااااام أخواتي الأتنين فى خبطة واحدة هيتخرجوا الواحد حاسس أنه هيطمئن عليهم أخيرا عقبال كده ما أجوزكم أنتوا الاتنين وأخلص منكم بقي قصدى يعنى أفرح بيكم
بس ايه ده أخواتى يتخرجوا ويقبضوا مرتبات وانا لسه فى الكلية وقدامى سنتين بحالهم (بالنسبة للمرتب المفروض يتقسم أصلا بس مش مهم أول شهر هأسيبكوا تفرحوا بيه لوحدكوا )
أنا متوقعة طبعا من دلوقتى أن مصطفى كل ما هيشوفني راحة الجامعة هيقولي أن أنا لسه صغيرة بقي وراحة الجامعة وواخدة القلم بقي والكراسة واقعد قدام الدكتور ويقعد يذل فيا عشان هو خلص من كل ده(بس مش ذنبي أنه أكبر مني وبيخرج من المراحل دى قبلي) بس من دلوقتى اهو بأقولها بأعلى صوتي أنا بأحب الجامعة وبأحب كليتي ومش عايزة أخرج منها زى ما مكنتش عايزة ثانوية عامة تخلص
بس والله الواحد فرحااااااااااااان جدااااااا جدااااااااااااا جداااااااااااااااااااااااااا
عيد ميلاااااااااااااااااااادي هيه هيه هيه هيه
والله وكبرت ومع ذلك ولا عقلت ولا أى حاجة
الواحد عايز يعمل فرررررررح
وهأخرج مع أصحابي بقي ونتفسح ونفسي مووووووت أن الدنيا تشتي علينا
بجد شهر سبعة ده أحلى شهر فى السنة والناس المولودة فيه كلها ناس مزااااااااااج كده زى حالاتي يعنى
يا سلااااااااااااااام
زى النهاردة الموافق يوم 10-7-1989 يوم الأتنين ما بين الساعة 10 الى 11 صباحا كنت أنا شرفت وتكرمت على الدنيا دى وخليتها تنور بوجودى هههههههههههه
ولحد النهاردة بعدها ب 19 سنة بحالهم لسه بأحس بالندم على الموضوع ده نزلت للدنيا لوحدى من غير ما حد يشدني وأشيله المسئولية والذنب هههههههههههههههههه
إحساس غريب خلاص 18 سنة عشتهم وكملت ال 19 سنة أهو عدت السنين دى كلها بحلوها ومرها وخيرها وشرها ونفس الريس هههههههههههههههههههه
بس بجد السنة اللى فاتت دى كانت أكتر سنة كئيبة مرت عليا فى حياتي كلهااااااااااا ومع ذلك فيها ذكريات مفرحة برضه جوايا(حافر صورتك جوايا على رأى فضل) وهتفضل محفورة جوايا على طول (الا لو الزهايمر اشتد عليا ونسيتها ونسيت أصحابي كمان هههههه)
أحلى رحلة وأحلى شلة أصحاب سمر وسلمى وسارة وعمتى نهى طبعا فوق الكل
وأحلى يوم برضه اللى كان قبل الرحلة فاكرينه طبعااا بتاع الرحلة يوم الاحد واحنا نقول رحلة ايه؟؟؟؟ ههههههههههههه
والله كانت يوم مسخرة
ولا اليوم اللى بعد الرحلة الناس كلها قعدت فى بيوتها واحنا نزلنا الجامعة (عيال فقر أساسا) وكنا ماشيين مش قادرين خالص وعضمنا كله بيوجعنا وبنتعجز على بعض ههههههههههههههههههه
بجد أحلى هدية خدتها السنة دى هى أنتوا وصداقتكم فعلا أكتر حاجة كانت بتطلع الواحد من الاكتئاب والقرف اللى شافوا السنة دى هى قعدة كده ونتلم سوا وأحلى تهييس يطلع مننا ههههههههههههههههه
ولا ايه يا عمتي؟؟؟ ردى يا ............ هههههههههههههههههههههههههه والله كان موقف عسل قووى
يللا كله بيقلب خير فى الاخر زى ما أنتوا عارفين
وأحب أهدى فى نهاية البرنامج أغنية "فى يوم فى شهر فى سنة" ليا هههههههههههههههههه
بس بجد أنا نفسي فى أمنية واحدة السنة دي (واحدة بس فى الوقت الحالى يعنى ) نفسي نأجر شقة عشان أيام الامتحانات نهيس براحتنااااااااا هههههههههههه لوووووووووووووز والله أيام الامتحانات دى أيام مفترجة
مين بقي اللى جاب سيرة الامتحانات؟؟؟
باقولكم النهاردة عيد ميلااااااااادي تقولولي امتحانات ومش عارفة ايه؟؟ بلاش كلام فاضى
هههههههههههههههههههههههههه
يللا كل سنة وأنتوا كلكم طيبين والسنة ادى معايا واللى جاى ويايا هههههههههههههههه
ربنا يخلينا لبعض
يللا بقي عايزة اقوم اتنطط شوية
سلااااااااااااااااااااااااااام

لأنني أحبك

لأنني أحبكِ

تختلف موازين الكون..

وتمشي الملائكةُ بين البشرْ

وتغوصُ الأرواحُ جميعُها

ذائبةً

في أرواحٍ أُخَرْ.

ينـزفُ قلمي وجعًا

إذ يذكرُ هالتكِ

بريئةً من أيامِ الصِّغَرْ

أذكركِ يومَ حياةٍ

وأعشقُ خَلَجاتٍ

من روحك

باتت لقلبيَ قمَرْ

أنا..نعم أنا نظرتُ عطشي

ونام فوقَ نفانف الثلجِ

قلبٌ بالألمِ يعتصرْ.

فاذكريني..

اذكريني عاشقًا متقلّبًا

فوقَ جمرِ الجوى..

جبانًا خائفًا

من سلامٍ قد عبَرْ..

من نظرةٍ عذراءَ

من نورٍ خاطفٍ

من أقصوصةٍ مسرودةٍ

على وردِ الشجرْ

واذكريني..

كلما ضربَ المطرُ

زجاج نوافذكِ

وأينعَت في قلبكِ

زهرةُ السّمَرْ

إننا قبل أن نكون

عُزفت أرواحُنا

من أنينِ نايٍ

في حُرمةِ السّهَرْ..

أيا قاتلةَ الجسدِ

داخل روحي..

قد هربت مني أفكارٌ

وخاصمتني سطورٌ

وعِبَر..

محبرتي تصرخ:

"كلمها يا ابن آدم

وقل لها:

من خلفِ الكلماتِ

كوّنتُ الدُّررْ..

في غرامكِ جفّفتُ أقلامي

وتحت ظِلال الحروفِ

عانيتُ السّفَرْ"

في ظلِّ "الحاءِ" قتلتِني

وفي ظلِّ "الباءِ" دفنتِني..

وبين هذا وذاك

طريقٌ من الزّهَرْ

فكيف استحال ذاكَ

حِمَمَ عذابٍ ومَررْ؟

ولماذا يومَ ألقاكِ..أخافُ؟

تخافُ كلماتي من الضّجَرْ؟

ولماذا تغتالني آخر ورقةٍ

من خريف الدنيا

ولوعةِ العُمُرْ؟

وإذا نظرتكِ..

يتبخّر في داخلي

بحرٌ من الشجاعة

قد ندَرْ

لو أنكِ تعلمين..

لو أنكِ تعلمين..

أنكِ كلما مرّ طيفكِ

أمام عيني

ناحت من قلمي

أبياتٌ وفِكَر!



آهِ ما أصعب أن ترى البحرَ

وأنتَ ظمآنُ الفؤاد

وأن ترى الجمالَ

فتختفي خلفَ سِتارِ القدَرْ!

منقووول لروعته :)
سلااااام

هو أنتي ليه بعيدة كده؟؟؟

هو أنتي ليه بعيدة كده؟؟
ومستحيلة بالشكل ده؟؟
سؤال صغير وجيه جدااااااااا طبعا موجه لشوية أحلام كده من الأحلام الكتيرة اللى عندى
واحد هيسأل ويقولي وإيه هي الأحلام دي؟؟
هأقوله الأحلام اللى المفروض تحصل فى المدى القريب للأسف مش المدى البعيد
واحد تانى هيسألني ويقولي ما هى طبيعة الأحلام كده أنها تبقي بعيدة لأنها أحلام مش واقع يعنى
ماشى ما أنا عارفة بس غصب عني وعن أى واحد بأحلم برضه
ساعات كتيرة احلام تروح وتضيع مني بس بأرجع تانى أحلم نفس الحلم اللى ضاع مش بأيدي والله غصب عني كل ما أغمض عيني أرجع أحلم تانى نفس الحلم واتمني يتحقق مع ان الظروف زى ما هي بس بالرغم من أني بحاول بكل طاقتي والله أنى أبقي متشائمة بس غصب عني الطبع يغلب التطبع وأرجع أتفائل تانى وأحلم تاني
بكل صراحة ووضوح أنا أكتشفت أني ما بتعلمش زى ما قالت أنغام وأرجع تانى لنفس الغلطة أحلم بس بجد هو فيه حل للموضوع ده؟؟؟
يعنى أنا أقدر أخد دواء يخليني أبطل أحلم؟؟؟
بس أعتقد أن الحياة بدون أحلام هتبقي صعبة قووووى أصعب من ان أكون بأحلم واحلامي تضيع ولا ايه؟؟؟
بجد أنا مش عارفة وتعبت قوى بقي كفاية كده عليا
اللهم أني لا أسالك رد القضاء ولكني أسالك اللطف فيه
بس هو الواحد مفيش حاجة فى ايديه أكتر من أنه يصبر ويدعى ربنا يمكن الأحلام دى تحقق للأسف أنا عاجزة أكتر من أني أتصرف
أول مرة أحس أنى نفسي أكبر عشان أقدر أحقق أحلامي لأن كده كتير قوى كمان مش كتير بس
المشكلة الكبيرة تكمن فى حلم واحد اكتر من غيره لأنه مش حلمي انا وبس وبجد بجد أنا مستعدة أموت والحلم ده يتحقق عشان أسعد الناس اللى حواليا
ربنا يكرم ويسترها علينااااا
وعامة أنا كفاية عليا كابة وخنقة وقرف
الواحد عيد ميلاااااااااده قرب وخدت قرار أنى خلاص هأفرح
ربنا يستر وأقدر أنفذ القرار ده بجد محتاجة كل الدعوات اللى تقدروا عليهاا
سلااااااااااااااااااام

أبقااااار

ده موضوع كنت قرأته زمان كده وعجبني قوى قوى يعنى :D فقلت أضحك الناس معايا يعنى
الشيوعية: أن تكون لديك بقرتان فتأخذ الحكومة الاثنتين وتمنحك بعض اللبن.

الفاشية: أن تكون لديك بقرتان فتأخذ الحكومة الاثنتين وتبيع لك بعض اللبن.

النازية: أن تكون لديك بقرتان فتأخذ الحكومة الاثنتين و تعدمك

البيروقراطية : أن تكون لديك بقرتان فتأخذ الحكومة الاثنتين وتقتل واحدة وتحلب الأخرى وتلقي باللبن بعيدًا.

الرأسمالية: أن تكون لديك بقرتان فتبيع واحدة وتبتاع ثورًا، من ثم ينمو القطيع فتبيعه وتتقاعد معتمدًا على الدخل.

شركة أمريكية: أن تكون لديك بقرتان فتبيع واحدة وترغم الأخرى على أن تعطيك لبن أربع بقرات ثم تستأجر خبيرًا استشاريًا لفهم لماذا ماتت البقرة


شركة فرنسية: أن تكون لديك بقرتان فتعلن الإضراب لأنك تطالب بثالثة.


شركة يابانية: أن تكون لديك بقرتان. تعيد تصميمهما جينيًا بحيث تصيرا عشر حجم البقرة العادية، مع مضاعفة اللبن عشرين مرة. ثم تبتكر شخصية بقرة للرسوم المتحركة اسمها (كاوكيمون) وتسوقها في العالم كله.


شركة ألمانية: أن تكون لديك بقرتان. تعيد تصميمهما جينيًا بحيث تعيش الواحدة مائة عام وتحلب نفسها و تأكل مرة كل شهر.


شركة إيطالية: أن تكون لديك بقرتان لكنك لا تعرف أين هما ثم تكف عن البحث لأن ساعة الغداء حانت.


شركة روسية: أن تكون لديك بقرتان تعدهما فتجد أن لديك خمس بقرات. تعد من جديد فتجد أن العدد 42 تعد من جديد فتجد أنهما بقرتان تتوقف لتفتح زجاجة فودكا أخرى.


شركة سويسرية: أن تكون لديك 5000 بقرة لا تملك واحدة منها. لكنك تتقاضى من الآخرين ثمن الاحتفاظ بها.


شركة صينية: أن تكون لديك بقرتان ولديك 300 واحد لحلبهما. تنشر أخبارًا عن انعدام البطالة وتقدمُ صناعة الألبان وتعتقل الصحفي الذي نشر الأرقام الحقيقية.


شركة هندية: أن تكون لديك بقرتان وأنت تعبدهما.


شركة بريطانية: أن تكون لديك بقرتان مجنونتان!


شركة مصرية: أن تكون لديك بقرتان كلتاهما ذهبتا لمبايعة مبارك
ههههههههههههههه حلوة أخر واحدة دي
ربنا يسترها علينااا
سلااااام

لما واحد يحب واحدة

دى كلمات مش أنا اللى كاتباه دى منقولة للكاتب الشاعر عمر طاهر بجد حلوة قوى عجبتني قوى قلت أحطها اشوف رأيكم
لما واحد يحب واحدة
وفي حياته تبقي واحدة
تبقي وردة ومهرة شاردة
بكرة بعدة والنهاردة عادي
لما واحدة تحب شاب
حب سهل حب صعب
تبقي قلب وأغلي قلب
يبقي أخ صديق وأب عادي
قال لك أية أمال مش عادي
قلت أنا مثلا لما تلاقي واحد زى في يوم بيحب
ويدبدب زى الأطفال علي الإسفلت ..
ويغني وأديه في جيوبه ..
وليلاتي يصلح في عيوبه
ويلون حلمه ومكتوبه
يقدر مثلا ..
يلحق ورقة شجر قبل ما عربية تدوسها
والشمس في عز الظهر يمد الأيد يلمسها
وكمان يقدر
يهزم ذاته يصالح نفسه
يعشق بكرة يصالح أمسه ..
أما حبيبته تدوب من لمسه
يقدر مثلا
يخلي حاجات ما بتكلمش
تمشي تغني زي الورد مثلا مثلا
يخلي اليأس يراجع نفسة
ويصبح فجأة أملا أملا
يخلي الليل في حكاية حب بطلا بطلا
وكمان يقدر يحزن جدا ..
جدا جدا لما يحس حبيبته بعيد
ويموت جدا ..
جدا جدا لما يبات من غيرها وحيد
واحد زى عمره ما صاحب يوم في حياته شيء عادي
.. لما يحب ما يكونش عادي لكن وارد مثلا مثلا
يصحي في يوم كده اهو عادي يلاقي حبيبته ما بتحبوش ... عادي
فوارد جدا
تلاقي قصيدة شايله اسمه الهادي ماشية تقول
لما واحد يحب واحدة
وفي حياته تبقي واحدة
تبقي وردة ومهرة شاردة
بكرة بعدة والنهاردة عادي

يللا سلام بقي

In Love

i'm in love
that's the truth
at the end
i know for sure that i'm in love
i know i'll stay in that love for ever
yes i'm in love
in love with someone
he is out there
looking for me
and i'm looking for him
i'm so in love with him
with that dream of mine
that i'll find him
and he'll find me
cause we are meant to be
together for ever
i can see his face
inside my heart
inside my mind
i know that's my fate
to keep looking for you
but i lost my dream
in the jam of life
i lost your love
in the scream
of a little child
i lost you in the middle of my tears
cause you weren't there
to tell me that it'll be ok
i lost you forever
but i still love you
still imagine you
every time it rains
every time i cry
i remember my little dream
that you will find me
cause i'm in love with you
with you
my beautiful little dream

written by me; hope you will like it

salaaaaaaam

ذكريااااااااااااتي

السلام عليكم
بما انى إنسانة على طول عندها حنين للماضى ففكرت اكتب شوية ذكرياتي فيها الحزين والمفرح والمحرج ويا ربت كل اللى يدخل يقول شوية من ذكرياته
هبدأ بذكرى مفرحة بالنسبة ليا قوى
هى أنى لما كنت فى سنة 5 ابتدائي كنت تعبت قوى وقعدت فى البيت ومكنتش باعرف أكل غير الشوربة ولسان العصفور تقريبا كان عندى اللوز فأخويا مصطفى قعد يقولى لما اخف هيجيب ليا هدية وفعلا انا فضلت مريضة لمده أسبوع او 10 أيام وطلع هو كان بيحوش مصروفه طول الفترة دى وجابلي كيس كبير مليان حاجات حلوة شيبسي ومصاصات وبونبوني ولبان وشوكولاته أحمدك يا رب :D طبعا كانت فرحتي يوميها كبيرة جداااااااااااااااا
ندخل على ذكرى كمان مضحكة
كنت أنا وأخويا مصطفى برضه بنخرج نلعب سوا وبعدين اكتشفنا مكان اللى هو ورا البنزينة اللى على الجلاء بس ايامها مكنتش البنزينة موجودة كان فيه هناك حاجة زى جرار كده قديم كنا نطلع ونقعد فوقه ونعمل ان احنا بنسوقه واتشاكلنا مع ناس مرة بسببه عشان كانوا بيقولوا انه بتاعهم واحنا بنقول انه بتاعنا عشان احنا اللى اكتشفناه الاول وفى الاخر جه راجل عجوز كده وزعق لينا كلنا ههههههههههههههههههههههههههههههههههه
ندخل بقي فى ذكرى محرجة شوية
مرة انا ومصطفى (نفسي اعرف هو محمد أخويا الكبير فين من كل الحاجات دى؟؟؟) كنا رحنا لجدتي فى سندوب وبعدين واحنا راجعين كنا بنتمشى من سندوب للمنصورة وطبعا وصلنا لحته كده بعد ربع المسافة وكنا عطشانين لاقينا ناس حاطة قصب كتير فوق بعضه وانا ومصطفى نفسنا راحت للقصب لاقينا راجل كده قالنا ناخد عود قصب فاحنا افتكرنا ان القصب بتاعه واخويا تسلق الاعواد عشان يجيب واحد من فوق (ما هنا كانوا مرصوصين فوق بعض ) وخدنا الواحد وجايين نمشى لاقينا راجل تانى طلع فجأة وبزعق ويقول تعالوا هنا انتوا بتسرقوا القصب وفى اللحظة دى أنا اللى كنت ماسكة العود خفت طبعا وطلعت اجرى ههههههههههههههههه وكان العود لسه فى ايدة من الخوف حتى ما فكرتش أنى ارميه ههههههههههههههههههههه واخويا يقولى طول الطريق بعد كده ان هما هيمسكونا ههههههههههههه نفسي ارجع تانى للراجل ده وادفع تمن العود هههههههههههههههه بس بسعر زمان مش دلوقتى هههههههههه
والذكرى الحزينة بقي
يوم وفاة جدى الله يرحمه كنا فى المنصورة وجدتي طلبتنا قالت أنه جدو مات فى حادثة وبتسأل على بابا طبعا هو كان فى الشغل ومش عارفين نوصله عشان يعمل المحضر يعنى وعشان هو الكبير برضه
فماما خدتنا ورحنا سندوب وفاكرة واحان رايحين كانت عربية هتخبطني وانا وقفت كده مش عارفة اعمل ايه من الخضة كانت عربية بيجو لونها ابيض أكتر حاجة محزنة بالنسبة ليا أنى مكنتش فاهمة يعنى ايه جدو مات؟؟ وقعدت ألعب مع بنت عمتي ونضحك واخويا الكبير محمد (اخيرا ظهر اهو ) جه يزعق لينا وقالى أن ما عنديش دم وان جدو مات وأنا قاعدة ألعب وأضحك (مين بقي اللى كان بيسأل على أخويا؟؟؟؟يا ريته ما ظهر) لحد دلوقتى حاسة بتأنيب ضمير لأنى كنت بألعب وأضحك بس فعلا أنا مكنتش فاهمة :(
وفيه ذكرى كمان عجيبة تعتبر محرجة جدااااااا
كنت انا زمان فاشلة فى الانجليزي وبعدين خدتها عند (من العناد يعنى ) وبدأت أذاكر كتير لحد ما بقيت المفترض يعنى شطورة خالص :D
فكنت مرة فى الدرس وأنا فى تانية اعدادى او تالتة وكان الاستاذ إسلام بيحبني جدا عشان شطورة بقي فمرة حضرت فى مجموعة غير مجموعتى وكانت الناس اللى فيها مش حافظة حاجة فى الكلمات ومستر إسلام اتنرفز فقال انه هيسمع ليا عشان يفتح نفسه تانى
وقعد فعلا يسمع ليا كتير قوى وانا أجاوب وفى الاخر بيسألنى ويقولى شباك قلتله ماله؟؟ قالى شباك يا سارة قلته أيوة يعنى ايه؟؟؟ قالى أنا اللى بسألك قلتله مش فاهمة :D قالى شباك زى اللى وراكى ده قلتله ماله يعنى مش فاهمة ايه الموضوع؟؟؟ ههههههههههههههههههههههه
مش عارفة كان مالى ساعتها وفعلا ما عرفتش ارد واقول شباك يعنى ايه ههههههههههههههههه يادى الاحراج اللى الواحد فيه
أنا قلت أنهى الموضوع بحاجة مضحكة شوية عشان محدش يزعل
يللا كل واحد يدخل بقي يطلع اللى جواه ويحكى كده مستنية الذكريات بتاعتكوا
سلااااااااااااااااااام

أنى أنتظر

اولا السلام عليكم
ثانيا دى حاجة صغيرة كده بمناسبة الاجازة يعنى :
أنى أنتظر أن تأتى الينا مرة أخرى
لكم توحشتك يا أبي
لكم اشتقت لك أنا وأخى الصغير
وهو يجرى حولي يلعب وهو يشعر بالأمان
ثم يأتى إلى كما لو أنه تذكر شيئ مهم ويسألنى عنك
ألن يأتى أبي؟؟ فابتسم له وأجيب سيأتى لكن تحلى بالصبر أيها الصغير
هيا يا أبي أسرع فى المجئ لقد اشتقنا لك للغاية
وفى كل مرة أنظر إلى أمى أرى نظرة الحزن فى عينيها وأعرف أنها تفكر فيك
ومشتاقة إليك مثلنا
هيا أسرع يا أبي فى المجئ
أعرف أنه صعب ولكن عندما تأتى ستحب هذا المكان للغاية فهو هاااااااااااااادئ جدااااا وياله من شعور رائع بالأمان تحسه هنا
هذا الأمان الذى لم أتعود عليه
أتذكر ذلك اليوم حقا لأ أعرف لماذا يبدو مشوشا لكنى أتذكر البداية جيدا
كنا على الإفطار وأخى يجرى فى المنزل وهو يلعب بطائرته الورقية ويضحك ببراءة
وفجأة سمعنا تلك الأصوات الغريبة كما لو أن هناك وحشا قادما يزمجر ورأيت نظرتك لأمى فى قلق فأخذت أخى الذى أرعبه الصوت بين أحضاني أحاول ان أبعده عن هذا الجو
يااااااااااااه كم كرهت كل هذه الضوضاء وهذه الأصوات صراااااااااااخ دمااااااااااااااء أطفااااااااااااال تبكي وأنا خااااائفة أحضن اخى الصغير وأدعى أن تمر هذه اللحظات وأن تكف تلك الأصوات عن إخافتي وإخافة اخى
وفعلا كنت قد أغمضت عيني من شدة الخوف وحتى لا أرى تلك الدماء ولا أعرف أين ذهبت ولا أين ذهبت أمى وفجأة لم أعد أسمع أى صراخ ولا بكاء أطفال فقط هدووووووووووووووووووء هدوء لذيذ يجعلك تنسى كل شيئ وتحس بالإرستخاء وفعلا توقف أخى عن الارتعاش والبكاء الخافت ونظرنا حولنا كم كان كل شيئ هادئ وكل شيئ كما هو وكأن كل هذا مجرد حلم لا بل كابوس مخيف أدعو الله ألا أراه مرة أخرى
وبدأت فى البحث عنكم فى المكان لكن لم أجدكم فشعرت بالخوف ولكن فجاة رأيت امى تركض وتبحث عنا
فعندما رأها أخى جرى عليها وجريت أنا أيضا وأخذتنا فى حضنها الدافئ وبدأ أخى فى اللعب مرة أخرى وهو يشعر بالأمان
ومن يومها ونحن ننتظر عودتك إلينا
فما الذى أخرك كل هذا الوقت؟؟؟
أعرف أنك خائف يا أبي وأعرف أنك وحيد ولكن ما تفعله هو الصواب فهيا قم وتعال إلينا نحن مشتاقون للغاية إليك
وهنا جاء صوت من بعيد هيا اصحي كفي نوم
فأجاب أبي هذا الصوت وقال حسنا أنا قادم
فسأله الصوت لقد كنت نائما كأهل الكهف
فقال له كنت أحلم بابنتي الصغيرة اذهب سأصلى الفجر وأتى خلفك
وصلى أبي وخرج مع هذا الرجل وذهب هناااااك إليهم
أراه من مكانى وأشعر بخوفه ولكن فى نفس الوقت بإيمانه وحزنه الشديد على فراقنا
لابد أن ينتقم منهم على ما فعلوه بنا يجب أن ينتقم منهم لقتلنا وقتل كل الأبرياء الذين سقطوا شهداء فى هذه الحرب المقيتة
هكذا كان يفكر أبي وأسمعه يقول الشهادة فى سره وفجأة
لم يحدث شيئ فقط الضوء الساطع الذى أعمى عيني
فأغمضتهما وعندما فتحتهما من جديد
رأيت أبي يقف هناك وهو لا يفهم ما حدث مثلي تماما فى بداية قدومى هنا فذهبت إليه وقلت له كم كنت مشتاقة إليك
هيا لنذهب لأمى وأخى سيفرحوا أنك أخيرا قد عدت وأخذته من يده وجريت ناحية أمى وأخى الصغير وأنا أقول بصوت عال أبي قد جاء أخيرا يا أمى وأخذنا أبي فى حضنه فهمست له حمدا لله على سلامتك يا أبي





:( :( محدش يدخل ويقول حزينة هى النهاية كويسة اهى
يللا أنا هأقوم أعيط فى جمب شوية
سلااااااااااااااااام

الدنيا ريشة فى هوا

أولا السلام عليكم
ثاينا طبعا عذرا لسمر سيدتي الفاضلة لأنى استلفت الاسم ده منها بس زى ما بأقول اللى بيحب حد بيحب كل حاجة تيجي منه
الأغنية دى ليها ذكريات كتيرة فى قلبي وقلب شلتى العزيزة 4S
كنا دايما نغينها واحنا فى الكلية لما الدنيا تمطر علينااااااااااا وكنا طبعا نبقي فرحانين جدااااااااا ونفضل نمشى تحت المطر ونروح مبلولين زى ما نكون اربعة بط وقعوا فى الميه هههههههههههههههه
ونروح البيت ماما تقعد تزعقلى عشان مبلولة خااااااااااالص وحالتى صعبة وأنا من النوع اللى بيحب يفرفر هههههههههههههه
اقعد اجيب اعذار ليها عشان ماتزعلش مني وتقولى كلمتها الشهيرة وما ركبتيش تاكسى ليه؟؟؟؟ أرد انا ردى الشهير وأقول ما أنا كده كده هأتبل لحد ما أوصل للبوابة بتاعت الجامعة ولحد ما أوقف تاكسى تقولى هى أحسن ما تاخدى السكة كلها فى المطر تبقي مشيتي حبة وركبتي الباقى ارد الرد المفضل بتاعى وأطلع أجرى اللى هو وذنب سواق التاكسى ايه أنى أبل التاكسى للراجل الغلبان؟؟؟؟ (شفتوا البراءة؟؟)
أنا عملت الموضوع ده مخصوص عشان أقول سبب انى اخترت الاسم ده ألا وهو الذكريات اللى قلتها ولأن مودى كان مدى على الأغنية دى وأنا بأعمل المدونة وبما أنى أنا بغزالة ومتقلبة المزاااااااج قررت قرار جمهورى أنى كل يوم أدخل أقول الغزالة موجودة فين أنا وأصحابي طبعا
وبالنسبة لمزاجى النهاردة فهو جميل لولا الجريمة اللى المفروض الواحد يذاكرها دى وبأقول لسمر وباقى شلتي
"أخاف أن تمطر الدنيا ولست معاكى فمنذ غبتي وعندى عقدة المطر"
وبالنسبة للصور فأول صورة دى للمنصورة مدينتي فى أيام الشتا
واللى تحتها صورة للنيل وكوبرى طلخا
أيوة هو ده اللى أنا ناوية أنتحر من فوقه وانط فى الميه اهو عشان تبقوا عرفتوا وتروحوا هناك وتقروا على روحى الفاتحة
يللا سلام عشان لسه مادة ونخلص الامتحانات بقي

شلتي والأو أر (OR)

دى كلمات أغنية من تأليفي وتلحيني وهى طبعا واحدة من إبداعاتي واللى هاقدمها للفنان الرائع والمبدع الأصيل قرصان الطرب وأمير غناء ميت الخولى دمياط الأستاذ إبراهيم الشربيني أسيبكم مع الأغنية بقي
صحيت من النوم قلت اللى فات فات المهم الجااااااى
وفتحت الأو أر وذاكرااااااااااات
وقلت ده أنا ميد ترم وقفلت وشيت وقدمت
وادى المذاكرة والمراجعة وخلصت
وقلت يا رب وفى الامتياز أنا فكرت
وفى الشباك وقفت
وللسمااا بصيت
ولربنا دعيت
للإمتياز أنا حنيت
وعشان خاطر الحاجة شقيت
وعلى الامتياز عيني أنا حطيت
جت ليلة الامتحان وقلقت
ومن امتحان التخلفاااااات أنا خفت
قلت لأصحاااابي أنا اتخنقت
ومن الترم ده خلاص مليت
ومن المذاكرة اتهريت
ومن الظلم ياما عانيت
قالولى ما تخافيش ده غير الاو أر مانشيلش
وفى الامتحان ما نجاوبش
قلتلهم يا ريت بس ما نفولش
وكل واحدة تقوم وتضربلها البرشااام
وتقول يا ريت اللى جرى ما كان
وعلى الدنيا السلاااااااام
وعلى كوبرى طلخا راح أنااااااااااااام
دخلت الامتحان وعلى صوت الدكتور أنا اتخضيت
ومن تقليل الوقت أنا عانيت
وعلى ورقة الأسئلة بصيت
ومن الامتحان احوليت
وعلى المراجعة ما نويت
سلمت الورقة ومشيت
وأصحابي استنيت
قلتلهم كده الموضوع بقي ...........................................
لووووووووووووووووووووووووووووووووز
وكفاية عليكوا كده سلاموووووووووووووز
مع تحياتي لعمتى نهى وشلة 4S

دخول إلى عالم التدوين

أهلا بكل الناس
السلام عليكم
دى أول مرة فى حياتي أعمل مدونة وأول مرة أجرب إحساس أنى أعبر عني نفسي وعن تفكيري قدام ناس كتيرة ممكن تدخل مدونتي
عشان كده أنا فرحاااااااانة
بالرغم من أنى أيام امتحانات حاليا والواحد زهق خلااااااااص بس اهو قربنا نخلص ونبدأ الإجازة ونبدأ فى الاجازة نشوف كل اللى نفسنا فيه عشان نعمله وكل اللى نفسنا نحققه عشان نحاول نحققه
عامة أنا سعيدة جدااااااااا وفرحانة جدااااااااااااااا
ونفسي أقدر أطلع كل اللى جوايا هنا وأسمع أراء الناس فيا وفى فكرى عشان أستفاد ويا ريت كمان أقدر أفيد
وكفاية عليا كده دلوقتى
سلاااااااااااااااااااااااام