My Memory &My Blog's BirthDay

عيد ميلاااد مدووووووونتي
كل سنة وأنتي طيبة
كملت سنتين باين :D
عقبال سنين كتييييرة كده
وربنا يحققلي كل أحلامي :)

بعيدا بقي عن الذكري السنوية للمدونة :)
دي كلمات أغنية
My Memory
من مسلسل كوري اسمه
Winter Sonata

My memory

i remember everything
i can see every little thing
when i close my eyes
you are far away
somewhere that i can't reach
i didn't say i love you
or i'll wait for you
i really didn't imagine
meeting you again
i still love you
i confess it to you now
i wanna love you forever
if it isn't too late i wish you stay forever with me
even though my heart lived without u for a long time
you still were in my heart
i really didn't imagine
meeting you again
i still love you
i confess it to you now
i wanna love you forever
if it isn't too late i wish you stay forever with me

NDE

NDE
اختصار ل
Near Death Experience
تجربة القرب من الموت
يمكن موضوع غريب شوية أني أرجع بيه بعد مدة من الصمت
بس الموضوع فيه دماغي بقاله كتير
هى تجربة ناس كتيرة حصلتلهم واتكلموا عنها وتمت دراستها
هى ببساطة شديدة وزي ما واضح فى الاسم
تجربة أنك تقرب قوووووي من الموت
يبقي قدامك وحاسس بيه وأن دي فعلا النهاية
ناس حكوا أنهم شافوا النفق المظلم اللى فى آخره نور
ناس حكوا أنهم شافوا حياتهم كلها بتمر قدامهم
وناس شافوا كأنهم طالعين للسما
أيا كان اللى بيتشاف وقتها
أكيد دي تجربة صعبة جدااا بس مفيدة جدااا لو الإنسان استغلها صح
بيقدر يعيد حسابات حاجات كتيرة قووووي

أنك فجأة مش قادر تتنفس
عقلك بيدي أوامر بس مفيش أى إستجابة من جسدك
مفيش أى حاجة فى ايديك أنك تعملها غير أنك تقول الشهادة وأنت بتفكر "هي دي النهاية؟"
ممكن ترجع وجسمك يستجيب لعقلك ورئتك ترجع تتنفس والقلب ينبض تاني بشكل سليم
ساعتها حاجات كتيرة هتتغير معاك

يمكن حد يسأل أنا عاوزة أوصل لأيه
ببساطة عاوزة أوصل أن أكيد تجربة زي دي بتعتبر زي منبه للإنسان عشان يمكن يكون بعد عن ربنا فيرجع تاني
يمكن بيغلط كتير وربنا -سبحانه وتعالي- عاوز يفوقه من تاني
وكمان عشان ساعات فيه حاجات بتشغل تفكيرنا قوووووي
ومش قادرين نبطل تفكير فيها
نعيد التفكير فيها مرة تانية
يعني بقالي كتير قوووووي مستنية النهاية
نهاية حاجات كتيرة قوي كنت عاوزة أوصلها
ومش عارفة أوصل
الغريب أن فجأة تلاقي نهاية تانية خااالص بتقرب منك
معتقدش خااالص أني من النوع المتمسك بالحياة قووي وبيحبها وكده
أه بخاف من الموت بس عشان مش عارفة ايه أنا اللى عملته ده ينفع يدخلني جنة ولا لأ
حاسة أن المفروض الواحد يقرب أكتر من كده لربنا
وغير كده حاسة أني محتاجة اعرف نهايات كتيرة لحاجات بقالي كتير مستنية أنها تحصل وقربت أفقد الأمل خلاص
بس فعلا حاسة أني محتاجة أعرفها

ربنا يستر ويوفقنا للى فيه الخير لينا
ومعلش لو الموضوع كئيب شوية بس قلت كفاية عليه قعاد فى دماغي كل ده :)
سلااااااام

مميزات أن تكون مكتئبا

طبعا فى البداية
كل سنة وأنتوا طيبين آخر اجازة نص سنة لينا
مبروك علينا كلنا وإن شاء الله تبقي حلوة علينا كلنا والترم الجاي يبقي حلو ونتخرج كلنا سوا إن شاء الله :)

مميزات أن تكون مكتئبا

أولا: تستطيع أن تحصل على ما تريد من أهلك
مثال: اهلك شايفين أنك مكتئب وحزين تروح تقولهم أنك عايز تطلع رحلة مثلا أكيد هيوافقوا ما أنت مكتئب بقي وهما عاوزينك ترجع تفرفش
وقس علي هذا الكثير

ثانيا: تستطيع أن تتهرب من طلبات البيت
مثال: أنتي قاعدة مكتئبة وحزينة وقافلة الأوضة وشكلك زي اللى ماتلك حد
عمر ما الحاجة هتدخل عليكي تزعق وتقولك ده منظر أوضة بنت قومي نضفي الأوضة
بالعكس احتمال تدخل هي تنضفها
وكده تبقي أرتحتي من التنضيف

ثالثا: تستطيع أن تتهرب من بعض المسئوليات
مثال: صاحبك جاي مخنوق من مادة ومش عارف يحل الشيت وبيقولك هات الشيت بتاعك عشان ينقل أو عاوزاك تحلله الشيت بتاعه عشان مش فاضى
هيلاقى أنك مكتئب وحزين وشكلك يجيب الهم هيسيبك واحتمال-لو حظك حلو- ياخد هو شيتك يحله مع بتاعه


رابعا : تستطيع كسب تعاطف الآخرين
مثال: شغال فى مشروع التخرج ومكتئب وحزين عمر ما حد هيفكر يجي يشيلك جزء زيادة
أو داخل مثلا تمتحن وشكلك كئيب وحزين
هتصعب على الدكتور واحتمال-هو احتمال صعب شويتين بس وارد الحدوث-
ينجحك شفقة على حالك

خامسا: تستطيع أن تقترب أكثر من الله ومن الناس أيضا
مثال: فى فترة الكأبة تقترب أكثر من الله ما أنت فى زنقة بقي ومحتاج تدعي ربنا يفكها
وأيضا تستطيع أن تشعر بالحزن من حولك أكثر وبالتالي تقترب من البشر ومشاكلهم وتفهم الحياة بعمق أكثر

سادسا :توفير فى الأموال
مثال: ما أنت طبيعي لما تكتئب لا هتبقي عاوز تخرج ولا تاكل ولا تتفسح ولا أى حاجة
وبالتالي تقدر توفر فى الميزانة أكتر
عشان كده البلد كلها مكتئبة كتوفير فى الأموال :D

سابعا:تستطيع أن يزداد وزنك أو ينقص(حسب حالتك)
مثال: لو كنت من نوعية الناس اللي لما يكتئبوا بياكلوا
فممكن تتخن بسهولة جدا فى الفترة دي
ولو كنت بالعكس تقدر تعمل ريجيم وتخس زي ما أنت عايز

ثامنا:تستطيع أن تكسب دعوات أكثر أيام الإمتحانات من جميع الدفعة والأقارب والجيران والبلد كلها
مثال: ما أنت مكتئب وبتمتحن وغلبان طبيعي اللى يشوفك هيدعيلك ربنا ينجحك بدل الكأبة اللى أنت فيها دي

تاسعا:تبحث أكتر عن السعادة وقد تجدها بسهولة اكثر
مثال:ما أنت طول ما أنت مكتئب بتحاول تخرج من الحالة دي وتفرح
بالتالي إحتمالات أنك تلاقى فعلا حاجة مفرحة أكتر
لكن الشخص الفرحان أصلا ما هو كده كده فرحان أكيد مش هيدور على حاجة تسعده :D


أعتقد كل دي مميزات تدعونا أن احنا نكتئب أكتر وأكتر
وأكيد كمان فيه مميزات تانية بس أنا نسيتهم
وطبعا بأرحب بأى إضافات :D
سلام

عيد ميلاااد سمسمتي

الآن وحصريااا فقط على مدونتي
أنا وسولا ونووشو وإحتفال أقل ما يكون بمناسبة خاصة جداااااااا
محتاجة كلام كتير عشان يقدر يوصف مدي سعادتنا بيها
عيد ميلااد سمسم
كل سنة وأنتي طيبة يا سمسمتي
وعقبال سنين كتيرة تقضيهم فى سعادة وراحة بال بإذن الله
وربنا يسعدلك أيامك :D
أكيد يعني مش هلاقي كلام كفاية عشان أقوله ليكي
بس أكيد برضه أنك حاسة باللي جوايا
سمسمتي يعني قلب الأم :D
سمسم يعني مصررررر :*
يعني ده إحتفال جمهوري بعيد ميلادك يا سمسم
مش هأقدر أقولك غير ربنا ما يحرمنا من بعض أبداااا
ونفضل سوا على طووووووول
واستمتعي
عشان زي ما كتبتي فى الورقة التاريخية
The last is the best
عاااوزااكي تعيشي بقي إستمتاع على الآخر خااالص يعني :*

والآن مع سولا -أنا اتكلمت كتير كده :D-

عيد ميلاد الليلة مييييييييييييييييييييين

عيد ميلاد سمسم
هنفرح ست الحلوين ونشيلها فى عيونا
النهاردة عيد ميلاد أحن وأطيب قلب فى الدنيا
عيد ميلاد سمسم
يعنى كل كلمة حلوة ممكن تقولها
يعنى كل كلمة حنينة
يعنى عيد ميلاد مامتى فى حنيتها وخوفها علينا
حاسة إنى عايزة أقول كلام كتيييييييييييير كمان
يعبر على اللى أنا فيه بس مهما قولت مش هقدر أوصفك
ولا هقدر أعبر عجز اللسان بقى عن الكلام
كل سنة وإنتى طيبة يا سمسم
ويارب السنة الجديدة تكون حلوة عليكى ياااااااااااااااااارب
وتحققى فيه كل اللى بتتمنيه وبتحلمى بيه
ونفضل أصحاب على طول

آميييين يااااا رب

ومع نوشو كختام :)
بكلمة مختصرة
كل سنة وأنتي طيبة
بحبك :*
:*:*

تفائل....ابتسم...... طب وبعدين؟؟؟

السلام عليكم ورحمة الله وبركاته

بعد شوط طويل بيني وبين نظريات وجمل التنمية البشرية والتفاؤل واضحك للدنيا وابتسم وكل حاجة -سبحان الله- هتبقي حلوة من غير حتي ما يقولك إن شاء الله
قررت أني مش لازم أسكت :D
بجد الحاجات دي أنا مش قادرة أقتنع بيها خالص
يعني ايه اللى هيحصل لو ابتسمت فى وش مشكلة قابلتني؟؟ أو ركزت طاقات عقلي فى أنها اتحلت والحياة بقت حلوة لو أنا ما قمتش فعلا واتحركت وعملت اللى عليا عشان أحل المشكلة دي؟؟
أصل الموضوع منطقي أكتر منه تفاؤلات وابتسامات وتخيلات
قدامك مشكلة أكيد ليها حل والحل ده عشان توصله له خطوات
قوم واعمل الخطوات نجحت يبقي الحمد لله
فشلت يبقي خلاص ده نصيبك وأنت حاولت واشتغلت وعملت اللى عليك
لكن ايه بقي النظرية فى ابتسم للحياة تبتسملك؟؟
يعني مثلا لو هتحصلي مصيبة كمان شوية وأنا ابتسمت المصيبة مش هتحصل؟
رد فعلي هيختلف؟؟ مش هتصدم؟؟
لأ أكيد هتصدم واكيد هأزعل ولازم أخد وقتي فى الزعل -بس من غير ما يزيد عن حده- وبعدين أراجع نفسي وأشوف ايه اللى حصل وليه وازاى أعالج الموقف وأخرج منه
ماشى ممكن الواحد يبتسم ويضحك ويتفائل بس ماينفعش يحط فى دماغه أنه لما يعمل كده الحياة هتبقي أحلي
أو ده هيسهل الوصول لأى حاجة هو نفسه فيها
لأ ده مش هيجيب نتيجة بس الشغل والخطوات الإيجابية هي اللى تقدر توصلك أو على الأقل تسعدك بجد مش مجرد ابتسامة عريضة وخلاص لأ هتبقي سعادة داخلية انك حاولت واتحركت
وبعدين الواحد طبيعي أنه متوقع أن فيه مشاكل هتقابله ومصايب هتيجي فوق دماغه فلازم يقدر بس يتعلم يبقي أكثر مرونة فى التعامل مع الصدمة الأولي لأى حاجة وحشة ممكن تحصل
ولا يبتسم ولا يتفائل ولا أى حاجة الموضوع مش محتاج غير شوية عقل وتفكير منطقي مع رضا بقضاء الله والعمل المنطقي عشان نخرج من الظروف الوحشة دي بس خلصت الحكاية
آه ده مش معناه أسود الدنيا فى وشي لأ أمشى حياتي عادي وإن شاء الله خير بس مايبقاش ده محور حياتي كلها يعني الحكاية مش محتاجة كلام كتير ولا تفاؤل ولا إبتسامة ولا أى حاجة من وجهة نظري بالعكس الحاجات دي ممكن تأثر سلبا لو مجابتش نتيجة
يعني الواحد لو تفائل قوي بشأن حاجة معينة -حلوة بشأن دي :)- أو فضل يحلم كتير بأنه حقق حلم معين وما حصلش هيضايق أكتر
يبقي ليه أتعب نفسي وأحلم وأفضل أتخيل أن الحلم اتحقق واتفائل وابتسم من قبل حتي ما اخد الخطوات اللى هتساعدني فى الوصول لحلمي ؟؟

يمكن وجهة نظري دي كلها عشان النصايح دي عمرها ما نفعت معايا ولا جابت أى نتيجة وممكن عشان وجهة نظري صح والكلام ده ملوش لازمة أصلا مش عارفة الحقيقة فين.......
أنتوا ايه رأيكم؟؟
نجحت معاكم النصائح دي قبل كده؟؟؟
مقتنعين فعلا بالنظريات دي؟؟؟
أنا عن نفسي بأحس بالخطر لما أبدا اتفائل الأيام دي
بس أحنا بدأنا فى سنة جديدة وإن شاء الله خير وتبقي سنة حلوة علينا ومفرحة
وتبقي ذكرياتها جميلة عشان نفتكرها بالخير
سنة التخرج بتاعتنا بإذن الله وبداية جديدة لينا كلنا :)
كل سنة وأنتوا طيبين
سلااااااااام

تحاول ولا لأ؟؟

سؤال بسيط
لو مر عليك موقف أنك حاولت تغيير حاجة أو تعترض على حاجة أو مجرد تقول رأيك
حاولت مرتين تلاتة وفشلت فيهم
عشان الناس اللى بتتعامل معاهم عشان تغير الحاجة اللى مش عاجباك دي أو الموقف اللى أنت فيه
مش عشان الموقف نفسه صعب يتغير بالعكس ده سهل جداااا
يا تري لو الموقف عاد نفسه تاني والوضع اتفرض عليك تاني
بس مع شوية اختلافات فيه -مش فى الناس للأسف-
هتحاول تاني تغير في الوضع ولا لأ؟؟
وليه هتحاول واحتمالات الفشل أكبر بكتييييييير؟؟
وليه ماتحاولش -حتى لو الأمل أضعف ما يكون-؟
على الأقل حسب مبدأ أنك تعمل اللى عليك وتريح ضميرك وتبقي حاولت
بس المشكلة مجرد أنك تمشى فى المحاولة بيدي أمل
أنك تقدر المرة دي توصل فعلا وتغير الوضع للوضع التاني اللى أنت عاوزه
ولما تفشل بتحس أن الامل اتكسر وأنك كده اتظلمت
لأنك مكنتش بتطلب مستحيل ولا اللى بتطلبه هيضر حد من الناس اللى المفروض يعملوه
بالعكس ده هيفيد ناس تانية أنا منهم
وضع محير جدااااااااا
وبجد مش عارفة أعمل ايه
انت ايه رأيك؟؟؟؟؟

My Fate

Again I'm in one of these situations

where
I do every thing i can
so I can reach my dream
but the last step to that dream
isn't mine to take
it isn't my call to make
it's someone's else decision to take
and it's either
that person won't take that step
or I'll keep waiting for him to take that step
so I can reach my dream
and I keep living in the probabilities
that he will take the decision now
or the next day
or the next month
or I might just die
before I see him taking that step
so I keep telling myself that it's my destiny
it's MY FATE
and I can't argue with that
cause it's God's well
maybe it won't be good for me if I did reach my dream
and the only thing I have is my Prayers to God