يا بلدي

كنت بمووت يا بلدي نفسي أنده عليكي
نفسي أزعق على الحق يلاقيكي
صوتي يعلي وسط شبابك يناديكي
يوصل لطيور السما تغني للحق وليكي
تطير من غير أجندة ما يمسكهاش غير ربي
ده ربي مع الحق واقف وللظلم شايف
ربي سامع ندايا ودعائي
وعلى الإجابة ربي قادر
نفسي يوصل صوتي وصوتها لأعلي مكان
يقول نادوا على الحق يمكن لما الظلم يسمعه يخاف
يقول مش أحنا النهاردة اللى هنخاف
ده لسه من الرماد بيطلع جان
والجان ميخافش بدام طلع
وصوته للتحرير خلاص وصل واتسمع
طب ليه بيتقال عليهم ده خاين وده عميل
واللى كان فيها أكبر عميل
وصل للرياسة ومسك فيها وكأنه قتيل
يا بلدي صوتي اتنبح
اسمعيني مرة وصلي صوتي لأكبر جبل
وصلي صوتي لنيلك ولبحورك
وصلي صوتي لناسك علشان يفهموكي
بتقوليلي صوتي وصل وطلباتي خلاص هتتعمل
طب أصدق حكامك ازاى ودائما كلامهم خيال
طب ودم الشهيد أسيبه ازاى
واللى قتلهم عايش ومش حاسس
أقول يمكن مش عارف
ولا خلاص نسي وضميره سكته
ولا مش عارف أن ربنا شايف
وأن ربنا هو اللى قايل أن اللى يقتل بشر
كأنه قتل كل البشر
ولا خلاص مبقاش خايف
ازاى دلوقتي صوتي يسكت
وأنا قلبي بيبكي على طيورك يا بلدي
وعلى شبابك اللى راح لما صوته للحق راح
بتقولوا نهدي والظالم لما اتكلم تقولوا نسمع
أسمع ايه ولا ايه والظلم بين
مش محتاج كلام
مش محتاج كلام يا بلدي
بحلم معاكي ببكرة جاي
للحق بيغني
وصوته بيجري عليا
خلاص الظلم راح
خلاص الظالم اتشال
خلاص اللى قتل اتسجن ولا اتدبح
خلاص الحق جاي
وبلدك هتبقي لأهلها
وشبابها يبني بكرة ليها
وادينا شفنا شبابها
رجالة بصحيح
يا بلدي خلاص متخافيش
نور الحق جالك
ومفيش من بعده كلام