تحاول ولا لأ؟؟

سؤال بسيط
لو مر عليك موقف أنك حاولت تغيير حاجة أو تعترض على حاجة أو مجرد تقول رأيك
حاولت مرتين تلاتة وفشلت فيهم
عشان الناس اللى بتتعامل معاهم عشان تغير الحاجة اللى مش عاجباك دي أو الموقف اللى أنت فيه
مش عشان الموقف نفسه صعب يتغير بالعكس ده سهل جداااا
يا تري لو الموقف عاد نفسه تاني والوضع اتفرض عليك تاني
بس مع شوية اختلافات فيه -مش فى الناس للأسف-
هتحاول تاني تغير في الوضع ولا لأ؟؟
وليه هتحاول واحتمالات الفشل أكبر بكتييييييير؟؟
وليه ماتحاولش -حتى لو الأمل أضعف ما يكون-؟
على الأقل حسب مبدأ أنك تعمل اللى عليك وتريح ضميرك وتبقي حاولت
بس المشكلة مجرد أنك تمشى فى المحاولة بيدي أمل
أنك تقدر المرة دي توصل فعلا وتغير الوضع للوضع التاني اللى أنت عاوزه
ولما تفشل بتحس أن الامل اتكسر وأنك كده اتظلمت
لأنك مكنتش بتطلب مستحيل ولا اللى بتطلبه هيضر حد من الناس اللى المفروض يعملوه
بالعكس ده هيفيد ناس تانية أنا منهم
وضع محير جدااااااااا
وبجد مش عارفة أعمل ايه
انت ايه رأيك؟؟؟؟؟

My Fate

Again I'm in one of these situations

where
I do every thing i can
so I can reach my dream
but the last step to that dream
isn't mine to take
it isn't my call to make
it's someone's else decision to take
and it's either
that person won't take that step
or I'll keep waiting for him to take that step
so I can reach my dream
and I keep living in the probabilities
that he will take the decision now
or the next day
or the next month
or I might just die
before I see him taking that step
so I keep telling myself that it's my destiny
it's MY FATE
and I can't argue with that
cause it's God's well
maybe it won't be good for me if I did reach my dream
and the only thing I have is my Prayers to God

عيد سعيد وألعاب طفولية

أولا كل سنة والناس طيبة وعيد سعيد إن شاء الله
ويكون ربنا تقبل منا سائر أعمالنا وجعلنا من العتقاء من النار اللهم آمين
تاني حاجة بقي تكملة لسلسلة حلقات طفولة متأخرة :D
قصدي بما أن الواحد بيفتكر أيام زمان قلت نفتكرها كلها
وخصوصا أن أطفال اليومين دول بيصعبوا عليا
حاسة أنهم مفيش عندهم إحساس اللعب ولا إختيارات اللعب اللى كانت عندنا
دلوقتي بقي فيه كمبيوتر وبلاى استيشن واكل كل وقتهم بدون مبالغة
وبرضه فى الشارع أخرهم لعب كورة أو يركبوا عجل أو يلعبوا اللعبة الغريبة -بتاعت مش عارفة وحوش وكل وحش له قوة وحاجات غريبة كده- اسمها باين يوجي يو
يعني الرياضة في حياتهم قلت قوي
أحنا بقي أيامنا كانت أيام عز فى اللعب والله

أنا فى طفولتي تقريبا مكنتش بأقعد فى البيت :D تقدروا تقولوا مشردة على رأي ناس ;)
وكانت فيه إختيارات لعب كتيرة
أنا هأتكلم بقي عن الألعاب بتاعتنا بإعتبارنا هنبقي جيل قديم بالنسبة للأطفال
واهو تبقي حاجة للتاريخ برضه :D
بعيدا عن الحاجات التقليدية وركوب العجل اللى كنت بأعشقه
أفتكر أيام ما كنا كلنا أطفال العيلة نتجمع فى بيت جدي وجدتي الله يرحمهم
كنا أربع بنات وست ولاد
طبيعي أن ألعاب البنات كان ملغية تماما من تفكيري ونظام العروسة والحاجات دي مكنش ليا فيه خالص :D
كنا بنلعب السبع طوبات وال "لأ" نفسي أعرف اسمها التاني ايه بس مش فاكرة عامة هيبان مع الشرح :D
السبع طوبات عشان الناس اللى ماتعرفش أو تعرفها باسم تاني
كانت -سبحان الله يعني - عبارة عن سبع طوبات يتحطوا فوق بعض
وفريقين بيلعبوا فريق مهمته يبعزق السبع طوبات ويخرج أعضاء الفريق التاني بأنه يخبط الكورة فيهم
والفريق التاني مهمته يحط السبع طوبات فوق بعض تاني
ال "لأ" بقي دي كانت برضه فريقين وكل فريق يرمي الكورة بحيث تخبط فى واحد من الفريق التاني وبكده يطلع بره
ولو بقي بدل ما الكورة تخبط فيه مسكها بيده يبقي خد نقطة أو محاولة معاه يعني
ده غير الجري بقي فى اللعبتين دول كان الواحد نفسه بيتقطع وكل الحاجات دي رياضة ومفيدة :D
الناس بقي تدخل تقول خبراتها فى الألعاب وهما أطفال وافتكروا أن الحاجات دي للتاريخ :D
وعيد سعيد مرة تانية عليكم كلكم بإذن الله
سلام

أفكار طفولية

السلام عليكم ورحمة الله وبركاته

أفكار طفولية
الواحد كده على ما يتذكر كان تفكيره طفولي قوي بالنسبة لتفكيره حاليا
وبالنسبة لأي مرحلة برضه
يعني مثلا وأنا صغيرة كانت عندي شوية أفكار لما بأفتكرها بأضحك جدااااا
مثلا يعني كنت فاكرة أني لو مثلا حشرة أو عنكبوت اتقتلت بشبشبي
مامتها وعيلتها بقي هتيجي تلاقى دمها على شبشبي وينتقموا مني =))
وكنت لما ماما تتعصب عليا وتقولي هأقلب على الوش التاني كنت بخاف جدااا
وأقعد أتصور أنها ممكن تقلب على الوش التاني وهى مش واخدة بالها وتتحول بقي لوحش عملاق كده =))
وكنت فاكرة أنه عشان أدعي ربنا والدعوة تستجاب لازم أكون بأبص للسما -لحد دلوقتي بأحب أدعي وأنا باصة للسما :) -
وطبعا حكاية لازم اتغطي عشان مفيش وحش ياكلني دي اساسي :D
لازم رجلي تتغطا عشان أى وحش أو كده رجلي ما تلعبش فى عينيه يقوم ياكلني =))
وما إلى ذلك طبعا من أفكار
زي مثلا الأفلام الأبيض وأسود أنا كنت فاكرة أن الدنيا أيامهم كان شكلها كده فعلا :D
يلا انا فضحتني بما فيه الكفاية
عاوزة بقي الناس تدخل تحكي عن أفكارها أيام الطفولة :)
سلام

موبينيل وفودافون كلام * كلام

السلام عليكم يا بشر
شفتوا طبعا أنتوا مع دخلة رمضان مئات الإعلانات من كل الحاجات وكل الناس
-حتى شويبس اللى بقالها 15 سنة تقريبا ما عملتش إعلانات عملت ودخلت فى اللعبة-
وحاليا بقي إعلانات موبينيل ملئت البلد والتليفزيون وفى كل القنوات والأماكن -ده أنا بقيت بأصحي عليها :D-

مش حقدا مني عشان مثلا أنا فودافون وإعلانات موبينيل ملئت البلد ولا حاجة :D
إعلان فودافون حلو برضه اهو

بس هو كده مش كتير يعني؟؟
والأحلي بقي أن الدقيقة بخمس قروش من بعد الدقيقة التالتة فى العرضين بالرغم أن مثل تلك الأشياء الوحشة :D لم يتم ذكرها فى الإعلان
يمكن عاوزنها تبقي مفاجاة لينا وهذا إحتمال وارد طبعا
وبعيدا برضه عن دخول إتصالات فى الموضوع بس هو العرض بتاعها اللى من أول دقيقة حسب ما وردني من أنباء عالمية
بس فعلا كفاية إعلانات بقي كده كتير ولا أنتوا ايه رأيكم؟؟؟
سلااام

رمضان جه

السلام عليكم ورحمة الله وبركاته
رمضان جه هيييييييييييييييه :)
فرحانة قوي انه جه زي الأطفال مع أني مش فاهمة هما بيفرحوا ليه :)
وامبارح بالذات 21-8-2009 كنت فرحانة لأسباب كتيرة جداااااااااا
عاوزة أسجل اليوم ده عشان الواحد يفضل يفتكره لما يضايق قوي :)
ربنا يهديني ويريحلي بالي على طوووووووول يا رب
ويتقبل صيامنا وقيامنا وأعمالنا ويغفرلنا ذنوبنا ويعفو عنا ويعتقنا من النار
كل سنة والناس كلها طيبة ورمضان كريم
وأنا متفائلة قوي أن الشهر ده هيبقي فيه خير كتير لينا كلنا إن شاء الله
مش هأطول فى الكلام كفاية كده :)
سلااااااااام

عيد ميلاد مدونتي

مدونتي حبيبتي

ياااااااه نسيت خاااااالص عيد ميلادك
بس أكيد يعني أنتي عارفة أني طول عمري بأنسي
هو كان يوم 1-6-2008 يوم الولادة :)
عدت سنة وشهرين اهو
حاسة أنى مقصرة معاكي قوي بس شوية كده وهابدأ أركز وأكتب حاجات كتيرة فى دماغي
كل سنة وأنتي طيبة يا مدونتي
ودي هدية مني ليكي

وعقبال سنين كتييييييير وتكوني دائما منورة بيا :D
ومنورة بالناس
وعاوزة الناس تدخل تشكر فى المدونة :D
قصدي عاوزة اشوف رأيكم فيها
إيجابيات سلبيات سواء فى المدونة أو حتى فيا
وكل سنة والناس طيبة
سلاااااااام

أنا بأعشق البحر

أنا بأعشق البحر أه والله فعلا دي حقيقة علمية :)
ياااااااااااه البحر هو ده الحاجة الوحيدة -وعيد ميلادي- اللى بيخلني أستحمل الصيف
البحر كبيييييييييييييير ومخيييييييف ورااااااااااائع فى نفس الوقت
ساعات بأحسه زيي مش ثابت على حال D: بغزالة يعني D:
بتحس دائما أنه فاهمك وحاسسك بيك وكأنه بتاعك أنت وبس
بتحس لما تقف قدامه كده وتغمض عينيك -ولو مفيش حد حواليك تفرد ايديك الاتنين على اخرهم زي ما تكون هتطير- وتشم ريحته وتسمع صوت الهواء كأنه بيغسلك من جواك بيمسحك همومك
بيخليني عندي القدرة أني أرجع تاني وأنا مزاجي صاااافى ومستعدة لأي حاجة
البحر الكلام عنه ما اعتقدش هيخلص
بس هو وحشني قوووووووووووووي وعاوزة أروح
وأعتقد دي الحاجة الوحيدة اللى ممكن تخرجني من الوحدة اللى أنا فيها لما أروح كده وأحكيله كل حاجة :)
وبأكرر الحقيقة العلمية تاااني "أنا بأعشق البحر"

Happy BirthDay

شايفين
الطيور بتطير فى شكل رقم 7
وهذا وإن دل على شيئ هيدل على مدي عبقرية الرقم ده :)
وسبحان الله يعني
شهر 7 زي رقم 7 كده مميز جداااا على الأقل بالنسبة ليا
وبعدين رقم 7 مميز فى حاجات كتيرة يعني السماوات سبع والارض سبع
وأيام الأسبوع 7 برضه :)
رقم مهم مهم يعني :)
وأهم حاجة فى الشهر أن عيد ميلادي فى الشهر ده
اه والله 10-7
يوم مهم جدا زي ما أحنا شايفين
وفى نفس اليوم عيد ميلاد سلمي بنت عمي
كل سنة وهى طيبة وكل سنة وأنا طيبة
وكل سنة واخويا طيب عيد ميلاده كان يوم 5
وكل سنة وكل الناس اللى مولودة فى شهر 7 بخير :)
إحساس غريب أن الواحد كمل 20 سنة
والأغرب أن السنة الجاية فى عيد ميلادي هيكون حاجات كتيرة اتغيرت
هأكون اتخرجت المفروض :(
وأنا أصلا مش عاوزة خاالص
بس أنا هأفرح ما هو عيد ميلااادي بقي :)
وعيد ميلاد سلملم هانم بنت عمي هتكمل 6 سنين بحااالهم :)
إحساس غريب أنها فيها كتير مني كده ومن حركاتي وأنا صغيرة
تلاقيني مش عارفة أزعق ما هى نفس حركتي =))
كفاية كده الواحد فرحان ومتفائل مع أن فيه حاجة كده مضايقاني شوية
بس الفرح هيبقي أكتر إن شاء الله
وكل سنة وكل الناس طيبة
وربنا يحققلنا كل أحلامنا ياااااااارب
سلاااااااااااام

وأنا داخلة على المدونة أكتب الكلام اللى فوق ده لاقيت سمر حبيبة قلبي كاتبة الكلام ده :*

طبعا سارة دايما تقولي لو في موضوع في بالي "لو عاوزة تكتبيه علي المدونة أكتبيه
أنا وأنتى أيه غير خمسه ;) "
فقولت بقي أنهارده يوم مميز جداااااا
يوم عيد ميلادك
فهكتب بقي
كل سنة وأنتي طيبة وعسوله :)
وعقبال سنين كتيرررررررر سعيدة
وتحققي كل أحلامك وطموحاتك إن شاء الله
وبالمناسبه السعيده دي بقي هنغني كلنا
"عيد ميلاد الليله مين ؟
عيد ميلاد النونه
هنفرح ست الحلوين ونشيلها في عيونا
نتمنى لها كل أمالها تتحقق وتعيش فرحانه"
أسمعى بقي الأغنيه أحسن عشان صوتى تعبان شويه :D

الكدب له أنواع؟؟؟

السلام عليكم ورحمة الله وبركاته
فيه جملة كتير بنسمعها
"ده كدب أبيض" وكمان بنسمع "ده كدب ما بيوديش النار"
هو فيه فعلا كده؟؟
أنا من وجهة نظري كله كدب
يعني مثلا لما تقابل حد بقالك كتير مش شوفته وأنت مش عاوز تشوفه أصلا يقعد يقولك وحشتني جداا والله كتير طبيعي هتقوله وأنت كمان على أساس ما تحرجوش بس هو الحقيقة مش وحشك ولا حاجة
هل ده كدب؟؟ ولا نفاق؟؟ ولا مجرد مجاملة؟؟
وعامة يعني لما تعامل حد مش بتحبه ولا طايقه معاملة حلوة زيه زي الناس اللى بتحبها ده يعتبر نفاق؟؟ ولا مجاملة؟؟ ولا ايه بالظبط؟؟
ومثلا لما دكتور يكدب على مريض عشان حالته النفسية
ده يعتبر كدب؟؟
يعني مثلا مريض حالته بتسوأ كل شوية عشان حالته النفسية وأنه فاكر أنه خلاص هيموت فالدكتور بيقوله أنه كويس وحالته بتتحسن وأنه معندوش حاجة مع أن حالته مش بتتحسن وهو عنده حاجات كتيرة
ده يعتبر كدب؟؟
وحالات كتير كده من النوع ده
يعني مثلا هو الكدب والخداع فى الحرب مثلا مسموح بيه دى الحالة الوحيدة اللى أعرفها
هل فيه حالات تانية الكدب مسموح بيه؟؟
عاوزة أشوف آراء الناس فى الموضوع ده لأنه فى دماغي بقاله كتير
سلااام

آه على قلب

آه على قلب قد أضناه الشوق
فنسي كيف ينبسط وكيف ينقبض
أجلس وحيدة فى الظلام والصمت يغمرني
انظر إلى أحلام قد كانت لى سندا
وقد لملمت أشلائها وذهبت مع من ذهبوا
أبكي فلا أجد بعيوني ما يكفي
من دموع لردم كل تلك الحفر
فكأنما طفلا شقيا لا يهمد
قد استوطن قلبي وملأه حفر
أخشى ما أخشي أن أنام وأصحي
لأجد قلبي قد ذهب إلى من ذهبوا
ادعوا الله خاشعة والدمع فى عيني
أن يبعد عني شر ما أحسبه خير
وأن تعود الدنيا كما اعتدتها
فيها من الخير ما يكفيني لأبتسم

معلش على شوية الكآبة دول بس أعمل ايه بقي :)
يارب تعجبكم شوية الخواطر دول
سلااام

سؤال بسيط

أهلااا بالزوار المدونة الكرام والسلام عليكم ورحمة الله وبركاته :)
بما أننا أيام إمتحانات وبما أني فاضية وعندي إمتحان OS2 فبالتالي قلت أدخل أشوف وجهة نظركم وإجاباتكم على السؤال البسيط ده:
أحلي ما فى الدنيا دي ايه يا تري؟؟
من وجهة نظر الناس كده
ايه أحلي ما فى الدنيا؟
ايه الحاجة اللى لو حصلت هتقول خلاص معدش عاوز حاجة تانية من الدنيا؟؟
هو أكيد رضا ربنا يعني أحلي حاجة ممكن تحصل للواحد بس أنا عاوزة إجابة تانية غير دي اللى بعدها يعني تاني حاجة ممكن تحصل تفرح الواحد جدااا وتخليه اللى هو طاير كده
موضوع بسيط خاالص اهو
مستنية أشوف إجابات الناس وإن شاء الله ننجح كلنا :)
واحب فى نهاية البرنامج أناشد الناس أنها تدعيلنا على قد ما تقدر الفترة اللى جاية
وسلااااام

يعني ايه صاحب؟؟

السلام عليكم ورحمة الله وبركاته
كان نفسي أكتب حاجة مفرحة بس للأسف مش عارفة لأني مش فرحانة هو الواحد عنده إحساس بالغربة :(
بس عاوزة أتكلم فى نفقطة مهمة حاجة إيجابية فى حياتي
يعني ايه صاحب؟؟
سيبكم من المعني اللغوي والحاجات دي
أنا بأتكلم عن المعني الإحساسي -لو فيه حاجة كده يعني :)-
صاااحب امممممممممم
صاحب يعني حد بيصاحبك فى كل حاجة سواء حلوة أو وحشة هو معاك
صاحب يعني حد لما تبقي مضايق قوي تعرف تتكلم معاه وتقوله أسرارك وأنت مطمئن جدااا حد تقدر تفضفض معاه يعني
صاحب يعني حد بيفهمك كويس جدااا حتى لو أنت مش فاهم نفسك فى اللحظة دي هو فاهمك
صاحب حد مقارب ليك جدااا فى التفكير وفى الصفات وفى الإحساس وفى كل حاجة تقريبا
صاحب حد وصل مدي التفاهم بينكم أنكم مش محتاجين كلام أصلا أنتوا حاسين ببعض بما فيه الكفاية
صاحب حد كده أنا تقريبا عشت عمري كله لحد ما قبل الجامعة من غيره وبعدين لاقيت الحمد لله ولاقيت أكتر من صاحبة :)
لاقيت صاحب يحس بيا وبنفس إحساسي لأن عنده نفس الإحساس
لاقيت اللى يفهمني من غير كلام من مجرد الحمد لله اللى بتكتب على الشات :)
لاقيت حد يعرف يضحكني لما أبقي زعلانة ويعرف يقنعني بالصح لو اخترت حاجة غلط
حد يشجعني لما أقع ويقدر يقومني بسرعة حد أقدر أعتمد عليه من غير ما أفكر كتير فى رأيه لأني عارفة أن هو نفس رأيي
لاقيت حد يقولي الصح حتى لو هيجرحني فى وقتها ويصارحني من غير مجاملة خااالص
الحمد لله أن ربنا رزقني أصحابي
أنا بس كتبت الموضوع لأني ببساطة من شوية قلت لصحابتي فكري فى الحاجات الإيجابية عشان تخرجي من أنك مضايقة إلى أنك مبسوطة
ولاقيت الكلام ده مناسب ليا جداااا يمكن أخرج من الحالة اللى أنا فيها دي فقلت أتكلم على حاجة إيجابية قعدت أفكر لاقيت مفيش حاجة إيجابية أتكلم عنها غير أصحابي :)
سلااااااااااااااااااااااااااام

Forever Palestine

السلام عليكم ورحمة الله وبركاته
كل سنة وانتم طيبين خلصنا الميد ترم الحمد لله
وربنا معانا فى اللى جاي ياا رب
أنا كنت عاوزة أنزل كلمات الأغنية دي لسامي يوسف أيام الحرب على غزة والحصار وكده
وبعدين لاقيت ناس كتير قالت واتكلمت وفرحت بيهم قوي وقلت بقى لأ أنا هأستني لما الموضوع يخلص وأحط الموضوع -مش رخامة مني ولا حاجة- بس عشان مش معني أن الموضوع هدي أن الحرب خلصت أو ان فلسطين رجعت لازم نفضل فاكرين أن فلسطين لسه فى حرب لحد ما ترجع تاني لينا بإذن الله وتتحرر وأتمني بس أعيش لحد ما أشوف اليوم ده إن شاء الله
دي كلمات الأغنية يا ربت تعجبكم وتأثر فيكم زي ما أثرت فيا
Forever Palestine


Mother don’t cry for me I am heading off to war
God almighty is my armour and sword
Palestine, Forever Palestine


Children being killed for throwing stones in the sky
They say to their parents don’t worry, God is on our side
Palestine, Forever Palestine


Mother don’t worry when they come for us at night
Surely they’ll be sorry when God puts them right
Tell me why they’re doing what was done to them
Don’t they know that God is with the oppressed and needy
Perished were the nations that ruled through tyranny
Palestine, Forever Palestine


Children of Palestine are fighting for their lives
They say to their parents we know that Palestine is our right
They to say to their parents we’ll fight for what is right
They say not to worry God is on our side
They say we’ll die for Palestine
Palestine, Forever Palestine

إمتحانات الميد ترم

إمتحانات الميد ترم

احمممممممم
كح كح ايهئ ايهئ
ايه ده؟؟
بيقولوا إمتحانات الميد ترم من أول يوم السبت
اوووووبااا
الأسبوع العالمي جااي تاااني
نبذة مختصرة عن كل مادة حسب ترتيب يوم إمتحانها
OS2
كلاااااام كتييييييير فى مرجع عجيب وتلاقى الراجل فى نص الكلام ونص الجملة قام قاطع كلامه وحاطط صورة وراجع بعدها مكمل الكلام!!
مش فاهمة "هل" كان هيحصله حاجة لو استني لما يخلص الجملة وبعدين يحط الصورة؟؟
عامة الله أعلم بظروف الناس
وبعدين بيستخسر يكتب جمب الإختصار ده إختصار لايه!!
والدكتور مقضيها معانا بنظرية عارفين ده؟ لأ يبقي تاسك ويختار حد يعمله!!

PLC
مادة حلوة وفى التمام ولذيذة وهتبقي بداية لمادة فى السنة الجاية مادة ال compiler
بس جات على آخر محاضرة قلبت إثبات عجيب كده
تقريبا والله أعلم مطلوب مننا نثبت أن البيضة شكلها بيضاوي :)
بس عامة متفائلة بيها خير بعيدا عن النقطة دي

SWE2
سوفت وير مادة حلوة ولذيذة بنكمل على الجزء الأول فى الترم اللى فات
هى كلامها كتير بس مفهوم
وأنا بأحب الدكتورة عامة
بس بيجي الإمتحان تقعد تكتب لحد ما روحك تطلع :)

AI
مادة كويسة وفيها فهم كتير
بس المشكلة فى الكام حتة الحفظ
وأنا فى الحفظ محدش يلاقيني
والمشكلة فى شكل الإمتحان الله أعلم بيه يعني الدكتور بيجيب حاجات من الشيت بس أسئلة مش لذيذة يعني
ده غير الوقت طبعا مش هيكفي يعني ربع يوم أذاكر فيه 5 شباتر ازاى!! الله أعلم
ربنا يسترهاا

DSP
مادة كلها مسائل وعامة مفهومة المسائل
بس القوانين غريبة شوية
والتعويضات بتاعتها كتيرة
بأحس أن هيجيلي حول منهاااا
يعني تلاقى عمال تجيب قيم من فوق على قيم من تحت يعني هتتحول هتتحول
والعملي بتاعها مضروب ضربا مبرحا
بنشتغله على السبورة :)
بس مش مشكلة أنها بنتخيل
لأن حسب شعار كليتنا
"حاسبااات تخيييل"
هنتخيل كل خير إن شاء الله

هو عامة طبعا أرخم مادة عندنا وده بسبب المرجع بتاعها هى أول مادة فتلاقى الواحد متفاااائل
بجد محتاجين دعواتكم
سلاااااااااام

حب الشتاء!!

"كل من يحبون الشتاء لم يتخلصوا بعد من رغبتهم الطفولية أن تغرق الدنيا فلا يذهبون إلى مدارسهم"
كلمات خطها أخي على ورقة وجدتها فى مكان ما
لا أستطيع أن أفهم كيف لا يحب الشتاء!!
كيف يستطيع أى شخص أن يكره هذا الفصل سألته
فقال لي الشتاء يوحي لي بالكآبة والحزن
فسألته بإستغراب وهل يوجد من يكره الحزن والكآبة؟؟؟
هذه حقيقة الشتاء يوحي لي دائما بالحنين لأشياء كثيرة
هذا الإحساس بالبرد وبإحدي يدي أبرد من الآخري لأنها تستخدم أكثر فى الكتابة على الكمبيوتر :)
وهذه النشوة التى نشعر بها جميعا عندما نصحو ونشعر بالبرد خارج حدود الغطاء ونجد أنه مازال هناك متسع من الوقت لقليل من النوم فتدنس تحت الغطاء وأنت تشعر بسعادة رهيبة تغمرك
والسعادة كانت تزداد إذا ما غبت يوما عن المدرسة وصحوت كالعادة فى معادي وسمعت صوت الطابور -فالمدرسة قريبة من البيت- فأرفع الغطاء حتى رأسي وأشعر بسعادة رهبية كما لو أنني ملكت العالم كله وحققت جميع أحلامي :)
وأكيد هناك دائما تلك السعادة التى تشعر بها عندما تمطر السماء عليك فتمد يديك على آخرهما وتشعر كأنك تطير!! وهناك تلك السعادة أيضا عندما تصحو من نومك على صوت قطرات المطر فتهب من فراشك كالملسوع وتجرى للشباك وتفتحه -فى محاولة عجيبة للإصابة بالبرد !!- وتخرج يديك من الشباك لتشعر بقطرات المطر عليهم -هذا قبل أن أسمع والدتي وهى تتوعدني بالقتل إذا لم أغلق النافذة :)) -
بعد كل هذا كيف لا أحب الشتاء؟؟
حتى عندما يرن الهاتف معلنا إنتهاء نومك -الذى ربما لم يتعدي الخمس ساعات أو أقل- فأسحب الهاتف-الموبايل يعنى :)- معي تحت الغطاء وأشعر بتلك الرغبة فى قتل السبب الذى يدعوني للإستيقاظ وترك كل هذا الدفء ولكني مجبرة للأسف
حتى هذا الشعور أحبه بطريقة ما!!
حقا لا أفهم كيف يوجد شخص لا يحب فصل الشتاء؟؟
أينعم هو يدعو للإسترخاء والكسل تحت الغطاء طوال اليوم
ولكن هناك أشياء كثيرة تدعوني لحب هذا الفصل
أينعم فصل الصيف أفضل منه في نقطة واحدة وهى المصيف والبحر
ولكن حب الشتاء أكبر بكثير.......
ويكفيني هذا الشعور الذى ينتابني مع بداية الشتاء حنيني لأشياء كثيرة وشعوري كما تقول الأغنية الليلة إحساسي غريب عاشق وأنا مالي حبيب
والآن كيف يوجد هذا الشخص الذى لا يحب الشتاء ؟؟ ولماذا؟؟
فقط أردت أن أقول أنا أحب فصل الشتاء بكل ما فيه -أى حد تاني بيحبه يدخل ويقول :))-
سلاااااااااااااااام

قصاصات صالحة للحرق

دي شوية من ضمن قصاصات صالحة للحرق لدكتور أحمد خالد توفيق كاتبي المفضل :) دول أكتر قصاصات عجبوني قلت أجيبهم وأحطهم للناس
أسيبكم معاهم بقى :
السعادة ليست مكاناً .. بل ھي اتجاه ..!
(برنارد شو)

يا للجو الرومانسي الساحر !.. إنه خطر داھم .. لو مشيت في ھذا الجو مع أية فتاة في العالم لتخيلت
أنك تحبھا بجنون !

ينتھي فيلم (العار) بنصيحة أخلاقية لا بأس بھا .. تجارة المخدرات مربحة جداً بشرط أن تتعلم إخفاءھا
تحت البحيرات المالحة !

ھناك علاقة ما بين تخلف البلد وبين أناقة حرسه الجمھوري .. لماذا تملك الدول العربية أجمل وأروع
حرس شرف رأيته في حياتي ؟.. حرس الشرف الإسرائيلي عملي جداً، يبدو أفراده كأنھم كانوا منشغلين
في الحرب حين استدعوھم لاستقبال ھذا الضيف أو ذاك !

أرجو أن تخفض الإضاءة .. فھذا يضفي على الحجرة جو الكآبة الذي أرجوه !

أقسى شيء في العالم أن تقنع من تحبه بأن يحب الأشياء التي تحبھا أنت !

أحب مباريات كرة القدم المعادة، حتى أقوم من البداية بتشجيع الفريق الذي سيفوز !

بعد أيام .. عندما تفقد التجربة ذاتيتھا وأھميتھا النابعة من كونھا تجربتي أنا.. عندئذ قد أكتبھا في قصة
قصيرة .. وربما لا أفعل ..

جو الشتاء الحزين ودفء البيت والحنين لشيء ما .. كل ھذا يغريك بأن تلصق انفك بزجاج النافذة وتحلم
.. لكن ھناك منذ ميلاد البشرية ما يرغم الإنسان على الخروج تحت الأمطار ذاھباً لمكان ما

كان ملحداً متعصباًُ.. وقد راح – أثناء مناقشتي معه - يقسم لي بالله العظيم أنه على حق !

تعريف التفاؤل ؟.. إذا قال القائد لجنوده إن العملية خطرة وإنه يتوقع أن يموت 99 من مائة منھم، فإن
التفاؤل يجعل كل واحد ينظر لرفاقه دامعًا ويقول لنفسه: يحزنني فقد الرفاق !

الدرس الذي تعلمته من ھذا الموقف ھو: لا تصارح الآخرين بعيوبھم إلى أن يكتشفوھا ھم بأنفسھم.

سئمت التظاھر بأنني آخر ..

إن شعرك جيد، ولكن ماذا تريد أن تقوله للناس في شعرك غير إنك شاعر ؟

لا يكفيك أن تنساھا .. يجب كذلك أن تنسى أنك نسيتھا !

إنھا تؤمن بي .. لن أعرف أبداً ما الذي تراه في ..
(أغنية قديمة لكيني رودجرز)

كلمة (العالم الحر) .. كلمة أمريكية اكتسبت رنيناً إمبريالياً استعمارياً عجيباً !!!

ألن يكفوا عن ھذا السخف ؟.. كل مجلة ترى على غلافھا عجوزاً متعصباً وتحت صورته عبارات من طراز:
"سيد عبد السميع يتكلم" .."شھادتي للتاريخ".. وداخل العدد تجد أحد الصامتين الذين قرروا أن يتكلموا
فجأة : "جمال عبد الناصر لم يكن يحب الجبنة البيضاء ..لقد كذب ھيكل"... "السادات لم يكن يشد السيفون
بعد مغادرة الحمام".. و"كنت جالساً مع إبراھيم حنفي وسيد شحاته حينما دخل عبد الناصر وفي يده
ساندوتش بسطرمة"..
كل واحد منھم كان الصديق الأقرب لأحد الزعماء، وكل واحد منھم يعرف يقيناً بالمكان الذي ذھب إليه
الزعيم بعد وفاته ..

يمكن أن تألف كل المشاعر الكريھة ما عدا الملل .. لم ألق من يمل الحديث عن الملل

أتركوا لي ما تبقى مني !!!

ھو مكتب كمبيوتر له ذات الاسم السخيف المكون من تباديل حروف (آي) و(سي) و(إس).. مثل آي
و Center سي سي .. وآي إس سي .. و سي آي سي .. كلھا تباديل وتوافيق حول كلمات
..Computer و International

المراھق ھو ذلك الكائن الذي يخرج من البيت في السابعة صباحًا، ولا يعود في موعد الغداء تاركًا أھله
غارقين في خواطر سوداء عن موته، ثم يعود في منتصف الليل واجدًا لديه من الشجاعة الأدبية ما يمنعه
من أن يكون قد مات فعلاً..!
التعبير للعبقري محمد عفيفي

ليتني أعرف مكان ھذه السوق السوداء لأشتري منھا !

لو سمح ببيع اللحم البشري عند الجزارين، لارتفعت قيمة الإنسان مرة أخرى .. عندئذ سيكون سعرك يا
صديقي آلاف الجنيھات ..

الثقة بالنفس كلام فارغ ..سوف يدھشك كم الأشياء التي لا تعرفھا أو لا تجيدھا .. المھم أن تثق
بقدرتك على أن تكون أفضل ..


"ذكريات محفوظة كزھور جافة بين أوراق وجداني" من أغنية فرنسية


يومًا ما سأقرأ كل ھذه الكتب وعندھا أصير رائعًا .. المشكلة أن ھذا اليوم لم يأت بعد ..


لقد سلبني القدماء أعظم أفكاري !.. لا أعرف من قال ھذه العبارة لكنھا أروع من أكون أنا صاحبھا ..


ھذه العلامات على ابني المراھق أعرفھا .. إنه شارد يمضي الساعات صامتًا .. على منضدة الطعام
يعبث بالملعقة في طبق الأرز بلا رغبة وبسأم .. بعد الطعام يسند رأسه على كفيه ويتنھد .. إنه يصفر في
شراھة .. إنه ينظر للنجوم .. لم يعد يركل الباب عند الدخول كعادته .. صوت فيروز لا يكف عن الصراخ في
غرفته . أعرف ھذه العلامات .. وبرغم كل شيء أسعد لھا .. معناھا أن اللعبة مستمرة لم تتوقف ... معناھا
أن الأرض لن تخلو من البشر .. لكن رفقًا به أيتھا الھرمونات .. لا تعذبيه كثيرًا من فضلك ..

ليتنا أنا وأنت جئنا العالم قبل اختراع التلفزيون والسينما لنعرف ھل ھذا حب حقًا أم أننا نتقمص ما
نراه؟


كان الليل صامتًا ذلك الصمت الذي يئز في الأذن ويصيبك بالصمم ..


إن عدم تساوي الحبين كارثة حقيقية .. لكنھا تحدث دائمًا كأن الأمر لا يتعلق بميزان بل بأرجوحة ... ومن
ھنا ولدت أغان مثل: تاريخ ميلادك باستناه . تاريخ ميلادي مش فاكراه .... بكتب اسمك يا حبيبي عالحور
العتيق .. تكتب اسمي يا حبيبي على رمل الطريق .. وإش جاب لجاب .. حبي أنا فوق السحاب .. وحبك
انت يا دوب تراب..


اليوم ھو أول يوم فيما بقى لي من عمر ... عبارة شكسبيرية عبقرية !


قال لي: أريد أن أسافر إلى أمريكا .. إلى بلد يعرف قدري .. قلت له: لماذا تريد أن تسافر لبلد يعرف
قدرك ؟... لماذا تريد ھذه الفضيحة ؟ .. في بلد طيب متسامح مثل مصر يمكن للحمار أن يظل مستورًا وأن
يأمل في وجبة العشاء.. لكن ھناك سيفتضح أمرك خلال ربع ساعة ... نصيحتي ھي.. ابق ھنا !


في كل مأزق في حياتي كنت أنتظر ذلك الشيء ما الذي لم اكن أعرف أنه عندي ليخرجني من ھذا
المأزق ... أنا الآن في انتظار ھذا الشيء !


قلت لھا مغضبًا: لماذا تميل النساء إلى الرجال الأوغاد الذين لا يوحون بأي ثقة ؟
قالت في برود: مثلما تنجذبون معشر الرجال إلى الفتيات المائعات اللاتي لا يعرفن كيف يرعين طفلاً أو
يحفظن بيتًا..


ھل أنا مكافأتك أم جزاؤك ؟.. وھل أنت ثوابي أم عقابي ؟


الرضا كوب من الماء الصافي .. يمكن لأي شيء أن يفسده..


اليوم 15 مارس .. يصر الكمبيوتر على أن منحناي النفسي في الحضيض ... لا أعرف كيف ... لكني
قررت أن أكتئب وأحزن فأنا لن أفھم أفضل من الكمبيوتر..


الحل الوحيد للمشاكل النفسية ھو: لا تكن عاطلاً... لا تكن وحيدًا..


ويفنى كل شيء..
كل الأحلام والشھوات والصراعات تموت..
ويبقى حبي المقدس لك يا طبق البامية الحبيب!


لأن ما حدث حدث في وقت لم يتوقع فيه أحد أن يحدث، فإن أحدًا لم يفعل شيئًا وبالتالي لا يوجد ما
يستحق التعليق عليه..


كنت أخافھا بكل الخوف الجديرة به فتاة تعرف أن (إيما لازاروس) ھي صاحبة الأبيات المكتوبة على
قاعدة تمثال الحرية!


كان إعلانًا عن بودرة لإزالة رائحة القدمين، يبدو فيه شاب سعيد لأنه تخلص من رائحة قدميه!


كل ما يقال الآن قيل من قبل .. لكنھم ينسون .. كلھم ينسون..


مصر غارقة في دوامة: كيف أعمل وأنت لا تعطيني مالاً ؟.. كيف أعطيك مالاً وأنت لا تعمل ؟


"ستشرق الشمس غدًا .. أيھا الغد .. أيھا الغد .. لكم احبك .. لا يفصلني عنك سوى يوم واحد !" أغنية
أحبھا من فيلم (فاني).


لولا أن مؤلف ھذه المسرحية ھو شكسبير لألقيتھا في الزبالة أو استبدلت بھا خمس مجلات ميكي
من عند عم أحمد .. حقًا إن لبعض الأسماء رھبة..


عبقرية ھي الفتاة التي تجيد التفرقة بين الدلال والميوعة ..! لو قابلتھا يا بني فلتتبعھا لآخر العالم


الناس تحترم – أو تعتقد أنھا تحترم - من يقول إنه تعيس .. لأنھم يعتبرون الحزن علامة على النضج ..
كأن السعادة خطيئة لا يجدر بالمرء إعلانھا .. أنا حزين وأنتم أوغاد .. ھذا ھو شعار كل إنسان


أنت رقيقة كزھرة البانسيه .. لا اعرف شكل زھرة البانسية لكني عرفته بعد ما رأيتك!..


مصر ھي البلد الوحيد في العالم الذي تصير فيه فتاة نجمة سينما لمجرد أنھا (بيضا وسمينة).. ھل
الأمر يتعلق بالفن أم بشراء جاموسة ؟

كان معلق المباراة يتكلم بسرعة، لدرجة أن اللاعبين راحوا يحاولون جاھدين عمل كل ھذه الأشياء
التي يصفھا

تفكير ساذج لكنه لذيذ.. ومنذ متى تتعارض اللذة مع السخف ؟

أحب الحزن .. ولو زالت أسبابه لشعرت بحزن عميق!!

من اجل ثوان كھذه يقولون إن الحياة كلھا جميلة..!

ھذا خط شاعر .. لم أعرف شاعرًا لم يلعب في حرف (الراء) ليجعله غريب الشكل..

-154 لو أن أبا الھول وجد عقد عمل للخليج لسفر خلال أسبوع .. الحمد لله أنھم لا يعطون التماثيل عقود
عمل!

امتحانات الشفوي ھي الامتحانات الوحيدة التي تعاقب فيھا على سوء حظك!

القليل من الغرور صحي .. علموا أولادكم كيف يتكبرون .. القليل من التواضع صحي .. علموا أولادكم
أنه لا قيمة لھم!

أنا مؤمن بالمثل القائل كل لتعيش ولا تعش لتأكل .. لكن ما ذنبي إذا كنت أحتاج إلى طبقين من الأرز
وخمسة أرغفة لأظل حيًا ؟

قرر ان يتخلى عن شرفه وأن يبيع مبادئه رخيصة .. لكنه لم يجد أي مشتر برغم ذلك ..! أي نحس ھذا

يمكنني أن أحب ألف واحدة غيرك .. وإن كنت أنت لا تبالين بي فھذا بوسع أية واحدة منھن..!

الناس ينجبون كي تكون عندھم ذريعة للاستسلام للقھر .. عندھا يصير بوسعھم ان يقولوا :لولا
أطفالنا لكنا قد فعلنا كذا وكذا....

الحب ھو ألا تحتاج إلى أن تقول (آسف) أبدًا .. أدق تعبير سمعته عن الحب من قصة حب ل (إريك
سيجال).. أعتقد أن الاعتذار يستغرق 80 % من أية قصة حب في مجتمعنا..

أليس مؤسفًا ان متعة الشيء لا تكتمل إلا بفقده ؟.. وأن نشوة الماضي ھي انه صار ماضيًا ؟

حبيبتي...لو وضعوك في كفة وفتيات العالم في كفة، لرجحت – حسب قوانين نيوتن – كفة فتيات
العالم..

الفلسفة ھي ألا تعيش الحياة حتى تفھمھا بشكل أفضل..

حاولت ان اثبت أن تسعة أعشار الذكاء جھد، لكن قدراتي العقلية كانت تنكمش تمامًا أمام ذكائه
الخارق .. وكان يرى أمورًا واضحة بالشمس تبدو لي غامضة كالموت .. إن الذكاء ھو قبس من حكمة
الخالق وليس لأحد أن يطمح إلى نصيب أكبر مما ناله

قد تكون إنفلونزا الدجاج اجتاحت مصر وقد لا يكون لھا وجود ..كل شيء ممكن وكل شيء مستحيل ..
إنھا الحيرة المعتادة بين حكومة تكتم كل شيء وشعب يروج ويصدق أية إشاعة!.

سوف نفشل ليس لأن الظروف ضدنا .. سنفشل لأننا قررنا أننا سنفشل..

الدواء الذي ليست له آثار جانبية ليست له آثار أصلاً.. قاعدة يعرفھا كل صيدلي لكنه لا يعترف بھا علنًا!

جنون البقر ثم إنفلونزا الدجاج .. ترى متى يبدأ جذام السمك ؟

الفتى الوسيم الذي يعمل في خدمة العملاء والذي تراه في إعلان خطوط ھاتف ..(.....) مبتسم
ضحوك أسنانه لامعة لا ھم له إلا راحتك أربعًا وعشرين ساعة، كأنه لا يصاب بصداع أو إسھال . لابد أنھم
يعطونه حقنة منومة كي يكف عن الابتسام وينام.

كقاعدة: الفتاة الجميلة تبدو في أسوأ حالاتھا يوم الزفاف، والفتاة متوسطة الجمال تبدو كأنھا أميرة
أحلام..

لو صار السفر إلى الماضي ممكنًا، لكان من الضروري أن يحيط بنا القادمون من عالم الغد!

قالوا إن الضحك يحرك عضلتين بينما الغضب يحرك عشرين عضلة .. فلماذا تتعب نفسك إذن ؟.. ھذا
صحيح .. لكن الغضب يحافظ على اتزانك النفسي ويخرج طاقتك العدوانية بدلاً من أن تأكلك من الداخل
كالحمض.

كلھم منھمك ووقته ضيق .. أعتقد أنني الوغد الوحيد غير المھم في مصر كلھا..

الأسماء العربية التي تكتب بحروف لاتينية تكون غريبة أصلاً بحيث تشك في نفسك .. لا يقابل المرء
اسم (السطلاوي) إلا مكتوبًا بحروف لاتينية!

كان لابد للموبايل أن ينتشر في مصر .. ومن نفس المنطق كان لابد أن ينجح اللاب توب .. ھذه لعبة
شائقة لا يمكن لمصري أن يقاومھا : أن تبدو شديد الأھمية.. أن تشبه المديرين التنفيذيين الأمريكيين.. كان
لابد للعبة أن تنجح وأن تمتص بالوعة ھذه الأشياء الاقتصاد المصري...

خطيبتي العزيزة .. إما انك تلقيت ھدية عمرك، وإما انك شربت أقسى خدعة في حياتك .. أنا لا أعرف
وأنت لن تعرفي إلا بعد أعوام!

أنا بخير .. لا ينقصني إلا المال والصحة والسعادة!..

ھذا الأحمق يتمادى في طموحاته .. تصوروا أن ھذا الساذج يريد أن يعيش ؟

ليس لھا أخوة ذكور .. ھذا رائع !... ھذه ھي الفتاة الوحيدة التي لن تقول لك: أنت في معزة اشرف أو
ھشام أخي !.. فلتغتنم الفرصة سريعًا وإلا فأنت أحمق!

في عالمنا العربي الصوت العالي منطق مقنع في حد ذاته..

ھذا ھو المصري الأصيل .. يعرض حياته للموت كي لا يدفع ثمن تذكرة القطار، ثم يدفع أضعاف ھذا
في مكالمة موبايل أو ثمنًا لحجري شيشة..

كلمتا (مواز) و(عمودي عليه) تسيبان مشكلة لأكثر الناس .. عندما يكلمك رجل الشارع عن) شارع
مواز) فھو غالبًا يتحدث عن (شارع متعامد)..

لا سبيل ليرضى الغرب عنك .. مھما فعلت أنت مقصر متخلف .. الحل الأمثل لھم ھو أن تنقرض...

ككل الزوجات لا تنصحك بشيء . فقط بعدھا تلومك على أنك لم تأخذ رأيھا: ظننتك ستكون أذكى من
ھذا ولا تفعل كذا .. لو طلبت رأيي لقلت لك كذا .. أما لو طلبت رأيھا قبل الأمر لقالت لك: أنت أدرى بشئونك

منذ كنت في الرابعة عشرة أفكر في كتابة قصيدة تقول: "مثل النساء جميعھن تعلمت ,كيف الكلام
بدون أن تتكلما ".. وحتى اليوم لم أجد المزاج الرائق لكتابتھا!

"الأمريكان لم يقصفوا قط مدينة بھا مكدونالد" .. كلمة قالھا جندي أمريكي في العراق وأرى أنھا
تلخص كل شيء!!!

أدب الاختلاف .. معنى انك لا ترى رأيي أنك وغد وأحمق. أتظاھر بالرقي لكني مغتاظ وأود لو حطمت
وجھك...

قطان ضالان على الرصيف يتبادلان المواء .. شعرت بأنھما متشردان من البشر يدور بينھما حديث من
نوع: الأخ ھجام والا ملقاط ؟

كلما ارتقى الفكر البشري رحب أكثر بمن يلبس الثياب المدنية.. لھذا تحب الشعوب العربية
العسكريين والرجال المزدانين بالنياشين .. في ھذا نوع من الطفولة كما يحب الأطفال ثياب الضابط..

في الفيلم الذي تعرضه الطائرة قبل الإقلاع ترى المضيف الوسيم يضحك وھو ينفخ سترة النجاة في
أناقة .. منتھى السعادة لسقوط الطائرة..

لي في ھذا العالم 42 سنة ولم أر قط شخصاً يغير رأيه إذا سمع رأياً أفضل، ولم أر سلعة ينخفض
سعرھا بعد الارتفاع..

كلما ظھر اسم البنك الدولي اقترن اسمه بالخراب في ذھني . المھم أنه منذ ظھر في حياتنا ونحن
نزداد فقراً... مثلما لم تعد مصر بخير منذ ظھر برنامج (صباح الخير يا مصر..(

بدء تطبيق اتفاقية الكومنتسا .. لا أعرف ما ھي ولا أفھم أي شيء عن الموضوع .. المھم أنه ضدنا
وخلاص!

من يضحك أخيرًا ............ھو شخص بطيء التفكير..

كانوا يھتفون بالروح والدم نفديك يا لبنان .. تشاءمت من ھذا النداء سيئ السمعة الذي لم يحقق شيئا
على طول تاريخ أمتنا.. لا تستعملوه ھنا من فضلكم..

قال لي: نحن نتحرك بفرق الجھد .. الغرب يتحرك بمجموع الجھود .. الفرد ھنا متميز لكن المجموع
فاشل .. ھنالك يوجد نظام مستقر يستفيد من كل جھد مھما صغر..

كأي واحد عاد من الخليج صارت مھمته إقناع الباقين ھنا أنھم يعيشون كالكلاب .. عندنا في الخليج
الطرق ممھدة .. عندنا لا تجد ھذا الزحام .. ھل ھذه ملاه ؟.. عندنا الطعام الشھى والجو أجمل والناس
ألطف..

كانت السيارة تمر بجوار النھر، عندما رأيت ذلك الرجل يقف شامخًا شاردًا ينظر للماء .. بدا لي في
الظلام وتوھج اللآلئ على صفحة الماء كأنه أسطورة .. كأنه جزء أصيل من ھذا الكون .. وتساءلت عن
الخواطر العبقرية التي تدور في ذھن ھذا الطيف .. أية قصيدة .. أية ذكريات ... لم يخيب الرجل ظني فقد
كان أعمق مما تصورت .. لقد فتح سرواله وراح يبول في الماء!

معنى الصداقة ھو أنني – تلقائيًا – أراك جديرًا بأن ائتمنك على جزء من كرامتي..

أضفت صورته لصور الذين أريد أن أتذكر أنني أحببتھم يومًا ما..

لا توجه المديح إلا لمن يحتاج إليه، فإنك إن وجھته للشخص الخطأ أھدرت كرامتك بلا داع..

مھما أحببنا الآخرين فلابد أن نجدھم سخفاء مبتذلين مملين في لحظة بعينھا .. لھذا يجب أن نغفر لمن
يبدون سأمھم منا..

(بيريجيب) كلمة روسية عبقرية .. محاولة تقويم العصا مما يؤدي إلى ثنيھا في اتجاه آخر .. كل حياتنا
ھي نوع من ھذا البيريجيب..

إنه من أبناء الزمن السھل، عندما كان كل ما عليك كي تحقق طموحاتك ھو أن تتعب وتكدح فقط!

ھناك من سيقرأ ھذه الخواطر يومًا، لذا لن أسجل حرفًا واحدًا من ذلك السر الرھيب..

قولي يا صغيرتي: ماذا فعلوا بك ؟.. ماذا قالوا حينما عرفوا أنك لي ؟

بس كده مش عارفة الموضوع هيعجبكم ولا لأ بس مستنية ردودكم
سلام :)

يوم من عمري

أولا السلام عليكم ورحمة الله وبركاته
ثانيا كل سنة والناس كلها طيبة النهاردة خدنا الاجازة
هو النهاردة يوم عجيب بطرق مختلفة بس انا بقالى مدة واخدة قرار اني أركز على الإيجابيات اللى في الحياة بس مش هأركز على اى حاجة حزينة خااالص عشان كده هأشيل أجزاء من اليوم ده
نبدأ اليوم من الساعة 5 العصر لما عبرنا لإسرائيل وبعدين عدينا معبر رفح :)) اه والله كان فيه عسكري كده جه ومشى الناس كلها وعمو ماستريحش غير لما عدينا خط كده كان موقف مضحك جدااااا
وبعدين خرجنا أنا وأصحابي سوا وطبعا نهي خلعت مننا "مش هاركز غير على الحاجات المفرحة" وروحنا اتغدينا سوا أحنا الأربعة وقابلنا اتنين سى اساوية هناك وبعدين شفنا اتنين حاسوباتين كمان وبعدين سمر حكت لينا موقف مضحك جداا وهي صغيرة فكرني بجزء من فيلم اجنبي اسمه "the animal" وهو بينط فى الميه وبيعمل زي السمكة :)) قعدت اضحك بسببه مدة طويلة كنت حاسة ان قلبي هيقف :)) "حركات بهلوانية " :))
ولما خرجنا شفنا حاسوباتين كمان وكمان :)) كل حاسبات كانت بتحتفل كما هو واضح فى اليوم ده
وبعدين اتمشينا شوية سوا وروحنا على المشاية وطبيعي جدا روحنا للنيل وبرضه شفنا فى السكة ناس حاسوباتين فى الطريق وكنا فرحانين قوي كل ما نشوف حد
وشيئ غريب جداااا لما تسمع حد بيقول عليك حاجة كويسة انا كنت فرحانة قوي لما سمعت زميلة عزيزة جداااا عليااا بتقول عليا كلام كويس بجد ربنا يكرمهااااا :)
وبعدين واحنا ماشيين قعدنا نفتكر حاجات من أيام الطفولة زي مثلا ماما كانت بتعلمني ازاى افرق بين علامة اكبر من وأصغر من أن العلامة دائما بتبص للكبير عشان هي جعانة قوي وعايزة تاكل الكبير عشان تشبع الصغير مش هيشبعها :)) وانا حفظت بموضوع العلامة بتبص لفين نظرية ال master method :)) وسارة حكت برضه عن الفرق بين الترتيب التصاعدي وانت طالع السلم والتنازلي وأنت نازل السلم من الكبير للصغير يعني :))
وبعدين روحنا قعدنا قدام النيل كده وانا وسارة فجاة هيسنا وقعدنا نضحك وبعدين لاقينا زورق أسود ماشى فى النيل وانا قلتهم ان ده فيلم الطريق الى إيلات :)) وانهم هيفجروا سفينة كده واقفة وسمر قالت هيفجروا الرصيف اللى أحنا قاعدين عليه ويتبقي البتاع اللى قاعدين عليها فى الهوا زي في توم وجيري لما البيت كله يقع وتفضل حتة :))
وقعدنا نضحك جداااااااااااا وكان الواحد حاسس وهو بيضحك انه بيضحك للتعويض :D ايوة كتعويض عن كل اللى فات من هم ومذاكرة وشد شعر وهبل وتهييس وضربات على الرأس عشان كده كنت باضحك بذمة :)
وبعدين اخر حاجة بقي لما وصلنا سمر وركبنا تاكسى احنا التلاتة وكنا بنشرح لعمو السواق الالجوزم الأفضل عشان يوصلنا لأن كلنا مش هننزل فى نفس المكان وقلنا على طريق فعلا وبعدين انا فجاة افتكرت أن آداب بقي اتجاه واحد وقلتله مش هينفع يا عمو :))
وقعد الراجل يسألنا احنا فى ثانوي وانا وسارة نضحك عشان عمر ما حد قال علينا أن أحنا أكبر من ثانوي "مش عارفة ليه ;) وبعدين قلنا فى جامعة مش ثانوي قعد يقول كليات كتيرة وانا وسارة قلنا أن عمره ما يعرف كليتنا :)) وبعد ما تقريبا قال كل الكليات الممكنة صعب علينا فقلنا حاسبات ومعلومات فى الآخر الراجل قام قايل كلية غريبة :))
وبعدين قعد يحكي قصة حياته أن متخرج من معهد من 6 سنين وخطب ست مرات كل سنة واحدة وتاخد الشبكة وتخلع :))
وبعدين نزلنا وسبنا سارة وهي صعبانة عليا جداااااا فى التاكسي تكمل هي وتسمع باقى قصة حياته :)) لما تدخلي بقي ابقي احكي الباقى يا سولا ;) وروحت البيت بقي على الساعة 9 وربع كده
وشوية وقعدت اتفرج على فيلم أجنبي حزين "من وجهة نظري" اسمه "The Curious Case Of Benjamin Button" بتاع براد بيت الجديد قصته حلوة جداااااا الواحد عينيه دمعت وهو بيتفرج عليه بس مش كان بسبب أنه حزين بس لكن الأسباب كتيرة "Hint: هاتكلم فى الإيجابيات بس " بس كده وبعدين بقي قلت أدخل أكتب عن اليوم ده عشان أبقي أفتكره بعد كده ومش عارفة ليه حاسة أني نسيت حاجة عامة مش مشكلة بقي :)
كل سنة والناس كلها طيبة وادعولنا نعدي الترم ده على خير فى النتيجة بقي
سلاااااااااااااام

ضربتين على الرأس

السلام عليكم ورحمة الله وبركاته
سيداتي سادتي معكم من أمام كشك حاسبات المجيد أنا (هيكون مين يعني ما هي دي مدونتي :) )
وهأحاول فى الحلقة دي من برنامج تهييس إمتحانات أن أقدم لكم ملخص للأحداث التي جرت ليا ولأصحابي طبعاا فى الأسبوع اللى فات واللى النهاردة كان آخره والحلقة بعنوان "ضربتين على الرأس"
أخدكم كده سريعا على الأحداث اللى حصلت من أول الأسبوع وبداية مذاكرة الشبكات والواحد تعب فيها قد ايه وقاعد يذاكر من الإكسبلوريشن (كتاب سيسكو يعني) لحد تقريبا ما حاسة أن نظري ضاااع تماماااااااا "والعملية هتفشل هتفشل " وبعدها حلمت حلم غريب ليلة الإمتحان مش هأحكي الحلم كله هأحكي حتة كده أن كان فيه أشباح بتلف حواليا أنا وأصحابي صحيت عادي جداااا وروحت الإمتحان والواحد متفائل خير وبيفكر كده فى الجيد جدااا بقي فى المادة والدنيا ربيع والجو بديع :)
دخلت الإمتحان شفت الأشباح اللى فى الحلم تحولوا بقدرة قادر الي أربعين سؤال ام سي كيو وده كان متوقع طبعااا وكمان ورقة لوحدها يتيمة فيها أسئلة نظري ومسألة منقسمة لمسألتين
سميت الله وبدأت أحل وطبيعي احوليت وطبيعي كلمت نفسي وطبيعي قعدت أضحك وحليت الحمد لله كل الأسئلة ما عدا تاني جزء فى المسألة إذا فجاة فى الإمتحان لسه باقى ربع ساعة بس أنا قررت أني مش هألحق أحلها وسبتها وخرجت !!!! :)) حاجة مسخرة
وخرجت لاقيت ردود أفعال الناس عجيبة كالعادة بس الغريب الناس كلها شايفة أن الإمتحان سهل بس طويل !!! لا تعليق طبعااا
خلص الإمتحان بس مش خلصت من المادة لسه فيه الإمتحان الفينال التاني بتاع سيسكو بقي :)) أه والله حاجة تشرح القلب بصراااحة
نيجي لتاني ضربة على الرأس
السوفت وير!!!!!!!!!!!!!!!!! تيرارررررراااااااا
بدأت مذاكرة بحب وتفاؤل عجيب أول مرة أحس بيه
أول يوم خلصت 4 شباتر وداخلة السرير على الساعة 4 الفجر تقريبااا بعد معاناة شديدة مع الشباتر الأربعة
تاني يوم ذاكرت الشابترين اللى باقيين وبعدين حصل ايه؟؟؟ راجعت وفتحت الشيت وحسيت بتفاؤل وفرحة إني عارفة أسئلة وإني إن شاء الله ربنا هيعوض صبري خير فى المادة دي :)
ليلة الإمتحان حلمت حلم تاني (مش عارفة ايه حكاية الأحلام دي ؟ :) ) بس كان حلم صاحية منه بأرتعش بصراحة
والحلم كان فيه مطر ........... إذن خير المطر خير إن شاء الله
وطول الطريق للإمتحان وأنا بأقول لأصحابي " كان فيه مطر يبقي خير "
(بصراحة المطر كله جه على دماغنا بعديييييييييين )
دخلنا الإمتحان والله أعلم بقي باللي حصل جوه
هو أولا كان فيه رائحة غاز فى الجو خلاتني أدوخ جداااااا وقاعدة أمتحن وراسي على البنش مش قادرة أرفعها
والإمتحان طوييييييييل والأسئلة كتيييييييييرة وجيت كده على نص الإمتحان وكان نفسي أقوم أقف وأسال فين المطر؟؟؟ فين الخير؟؟
بصراحة بعد ما كنت بأفكر فى الجيد جدا قعدت أكلم نفسي كالعادة واحسب هأنجح ولا لأ
هو الحمد لله هأنجح بس يعني هو مثلا الدكاترة مستخسرين فينا الدرجات؟؟؟
ولا مثلا ماما ملهاش نفس تفرح بيا وأنا جايبة جيد جدا!!!!!
ولا مثلا التعب اللى بأتعبه ده مش تعب وانا بأستهبل !!!!
الله أعلم بصراحة
بس فعلا الواحد مش مستحمل خااااااااالص (الحمد لله على كل حال)
وكمان المادة الجاية مادة طويلة ما شاء الله بس ربنا يعوضني خير في المواد الجاية يمكن ألحق أعدل التقدير بتاعي وأجيب تقدير كويس وأخرج من دائرة الجيد المغلقة اللى دخلتها دي !!
بس بقي كده البرنامج أتحرق :))
وسؤال الحلقة فى النهاية ليه أنا بقيت بأكتب جمل كتيرة بين قوسين؟؟؟
لو عرفت تكسب معانا كيس تهييس هدية :))
وأشوفكم على خير بقي ويااا ريت تدعو لينا نخرج بسلااااام من الترم ده
(أنا ايه دخلني حاسبات ؟؟ والأهم ايه دخلني سى اس؟؟ :)) ) ومعلش أحنا بنتبهدل ;)
سلاااااااااااام

عيد ميلاااااااااااااااد سمسم

النهاااااردة يوم تاريخي
لابد من تسجيله
النهاردة يوم 10-1-2009
عيد ميلاااااااد سمسم سمسمتي حبيبة قلبي " وفيه اسم دلع كمان بس ده سر "
والحب الحب الشوق الشوق :)
بجد سمر دي أحلي هدية بعتها "القدر " لياااا
ومن أحلي الناس اللى ممكن الواحد يقابلهم ويتعرف عليهم
سمر بتتعامل معايا زي ما تكوني مامتي
وأنا بأحب أقولها يا ماما
عمري ما أعرف أزعلها لأن هأبقي زعلت نفسي الأول
عمري ما عرفت أخبي عليها حاجة
مش عارفة ليه بس هى بتعرف أني مخبية حاجة وبتعرف تخليني أتكلم من غير ما تعمل حاجة أصلا
وبتعرف تفهمني من غير حاجة من غير ما تشوف وشي بتعرف حالتي عاملة ازاى
ساعات كتيرة بأحس أنها فاهماني أكتر ما انا فاهمة نفسي
بجد لو فضلت أوصف فيها مش هيكفي كلام ولا هتكفي مساحة
يعني ازاى الواحد يوصف حلاوة البحر أو جمال السماء فى كلام عادي كده من بتاعنا؟؟؟
أكيد مش هينفع
سمر تحسها عاقلة جدااا لو اتكلمنا فى موضوع يخصنا أو حاجة بتضايقنا
وتلاقيها زينا فى جنونا لما نبقي فرحانين
وكفاية أنها أقرب ليا مني فعلااا
أخيراا كملت 20 سنة
والنهاردة يعني مش عارفة أقول ايه من الفرحة
يا ريت كان ليك حوالى 17 عيد ميلاد فى السنة عشان الواحد يفرح كده كتييير يا سمر
بجد بجد الواحد عاجز انه يوصف إحساسه دلوقتي
وعاجز انه يوصف اللى جواه
بس بجد ربنا يخليكي ليااااا
وأفضل "قدرك" على طول مع أني كنت عايزة أحميكي منه بس أعمل ايه بقي أنتي مصممة
كل سنة وأنتي طيبة يا سمسم
ويااااااااااااااا رب السنة دي تبقي أحلي بكتييييييييير من السنة اللى فاتت
ويااا رب ما أشوفك مضايقة أبداااا
وعامة لو شفتك هأبقي أضحكك "أمال أنا لازمتي ايه لو فضلتي مضايقة معايا" ولا ايه ؟ ;)
حاسة أن الدنيا كلها المفروض تغني وتنطط دلوقتي بس هي مكسوفة شوية يا سمسم :))
يللا كفاية كده على البوست بس أكيد مش كفاية عليكي
سلاااااااااااااااااام

صور

السلام عليكم
بقالى مدة عايزة أكتب حاجة بس مش عارفة ايه هي
فقررت أخلي الصور تتكلم هي شوية
دي شوية صور أنا بأحبها (وبتوضح مدي عبقريتي :) )
نبدأ بقي يللا
دي صورة لخلفية كليتنا (حاسبات ومعلومات) ده المنظر الخلفي للكلية يعني
منظر حلو جدااا (أنا كنت بحاول أصور نخلة سمسم بس ماعرفتش بقي فصورت نخل كتير وخلاص وهنقول أنه كله بتاع سمر ;) )
تاني صورة بقي
دي بقي كليتي ذات نفسها كنا بلليل في سكشن والكلية كان شكلها حلو قوي فقلت ألقط صورة وكليتنا حلوة :)
تالت صورة بقي

دي صورة للمنصورة شارع المشاية عند مسجد السلاب كده كانت شكل السماء حلوة قوي ما قدرتش مش أصورها وعجز الموبايل بصراحة :))
رابع صورة بقي

دي فى اسكندرية فى الرحلة بتاعتنا (الواحد خد كمية صور كبيرة هناك بصراحة بس للأسف راح كتير منهم :(( بس عامة خير يعني )

الصورة النهائية اللى هأقفل بيها الموضوع

مش عارفة أتكلم عليها
المنظر كان رااائع جدااا بصراحة
هاا ايه رأيكم بقي فى الصور ؟؟؟ ;) اكيد حلوين :)
ويا ريت تبقوا تضغطوا على الصور بتبان أكبر وأحلي (بسم الله ما شاء الله عليا :D )
سلااام بقي