هذا هو الفارق

اتعودت دائما لما أسمع رأي شخص فى أى حوار إني احط فى بالي ثقافته ونشأته عاملة ازاي قبل ما أرد عليه أو أتبني موقف ضده
يعني مثلا لما واحد يجي يقولك هما الدكاترة عاوزين يعملوا اضراب هو ده وقته؟ هما معندهمش قلب؟ كل همهم الفلوس؟
اقف كده وخد من وقتك لحظة وفكر: هتلاقي أولا هو أكيد شخص مستريح ماديا -اللهم لا حسد يعني-
وهتلاقي كمان هو شخص من الجيل الأكبر مننا -مش شباب يعني-
طب يبقي قبل ما أرد علي شخص بيتكلم بالمنطق ده لازم الاول نحاول نخليه يشوف الدنيا من وجهة نظر مختلفة شوية
وساعتها بس نشوف رأيه هيتغير ولا لأ وساعتها بس نقرر هنرد عليه ازاي
طيب أولا أنا مثلا واحدة بتشتغل فى مكان كويس -اشتغلت فيه بالواسطة- وبقبض مرتب كويس -عشان ده مكان من اللي بيروحوا الناس بالواسطة- عندي عربية ومشتركة فى نادي وقادرة اصرف على ولادي كويس وادخلهم مدارس خاصة 
يجي واحد يكلمني بقي عن الفساد وقد ايه فى ناس مظلومة ومش لاقية لا تشتغل ولا تسكن فى مكان كويس ولا حتي تاكل أو تشرب
أحس بيهم ازاي؟؟؟
أكيد صعب وخصوصا أن مش كل الناس عندها إحساس عالي ببقية البشر
دي ناس ولا كان فارق معاها ثورة 25 يناير ولا غيره لأن أصلا الفساد اللي كان موجود أيامها مكنش مضايقهم بالعكس كان بيصب فى مصلحتهم الشخصية
طب تمام اتعملت ثورة وقالك يعني ميضرش احنا مش خسرانين حاجة
جه بقي رئيس فاشل والبلد بتقع أكتر وبدأت شوية من المميزات اللي كانوا واخدينها بتروح
أكيد ساعتها كان لازم يتحركوا لأن الموضوع بدأ يوصل لعندهم
جات الناس دي ونزلت تشيل مرسي.....معظم اللي نزل مكنش الشباب اللي عمل ثورة 25 يناير
معظم الناس دي كانت بتفكر صح لسه وبالرغم من اعتراضها على مرسي وسياسات الاخوان كانوا عاوزينه يمشي بإستفتاء شعبي على بقاءه من عدمه
بس ما علينا يا سيدي محدش زعل أنه مشي غير الإخوان نفسهم
بس اللي يزعل بقي أن تلاقي كل حاجة بترجع تاني لما قبل ثورة 25 يناير
تفتكر الناس دي هتبقي زعلانة؟؟؟
بالعكس كل مصالحهم والمميزات اللي كانوا واخدينها بسبب الفساد بيرجع تاني
هيزعلوا ليه؟؟؟ انا منهم اعمل فرح :)
طيب تمام.....
الناس دي مش بتحتاج تودي ولادها مستشفيات حكومية ولا تقف فى طابور ولا تركب مواصلات عامة عشان تروح شغلها ده لو فيه شغل أصلا ولا تستني مرتب ميكفيش عشان يتصرف أول ما يتاخد ولا ولا ولا.....
الناس دي أصلا ولا تعبت فى مذاكرة ودراسة عشان تيجي تتكلم عن ناس تعبت طول عمرها عشان يبقي دكتور وفى الآخر يموت بسبب إهمال حكومي بشكل مستفز للمستشفيات وحقوق الناس دي
لو حد من الناس دي ابنه مثلا دكتور فهو مش هيخلي ابنه يستني مرتبه اللي هو ملاليم عشان يصرف منه على بيته وأهله
لأ دول ناس هما اللي جوزوا ولادهم دول وهما اللي لسه بيصرفوا عليهم أو أصلا دخلوهم فى نفس المكان بتاع الناس أم واسطة اللي بتاخد مرتبات محترمة 
فكر الأول الناس دي عايشة ازاي وعاشت ازاي قبل ما تفكر هما ليه شايفين أن مثلا الأطباء أو اي فئة تانية مش واخدة حقها فى البلد ملهاش حق تتكلم وهما كده بيعطلوا الدولة والمسيرة التقدمية الجميلة اللي البلد هتعيشها عشان تبقي قد الدنيا!!!
حط نفسك مكان الناس دي ولو لاقيت نفسك لسه مقتنع بأن من حق الأطباء أو أي فئة مظلومة أنها تاخد حقهاا
ولاقيت نفسك لسه شايف أن فيه حاجات كتيرة لازم تتغير وأن الوضع الحالي فيه أخطاء كتيرة لازم تتغير
أحب أقولك ببساطة شديدة أنت كده لسه إنسان طبيعي عاقل عنده إحساس بالمسئولية تجاه باقي الناس
ومش عايش بمبدأ أنا ومن بعدي الطوفان
هذا هو الفارق بين ناس بتفكر فى نفسها ومصالحها بس وناس تانية حاسة باللي حواليها حتي لو هيا عايشة فى مستوي ووضع أفضل
الفارق بين ناس تري الحق هو فقط ما يأتي على هواها وأن من معه فى هذا الحق هم فقط من يستحق العيش وأن من مات وهو على نفس هذا الحق فهو شهيد أما الباقي فهم أعداء وقتلاهم فى النار!!!
هؤلاء من حق عليهم قوله سبحانه وتعالي {أَفَرَأَيْتَ مَنِ اتَّخَذَ إِلَهَهُ هَوَاهُ وَأَضَلَّهُ اللَّهُ عَلَى عِلْمٍ وَخَتَمَ عَلَى سَمْعِهِ وَقَلْبِهِ وَجَعَلَ عَلَى بَصَرِهِ غِشَاوَةً فَمَن يَهْدِيهِ مِن بَعْدِ اللَّهِ أَفَلَا تَذَكَّرُونَ}
وبين من يري الحق وينطق به ولو كان على رقبته فهو يري أن الساكت عن الحق شيطان أخرس
الفارق بين إني حتي لو معايا فلوس ومرتاحة وبشتغل فى مجال كويس والحمد لله مش بواسطة ولا حاجة بالعكس عشان الواحد تعب سواء فى دراسته أو فى شغله بس برضه لسه بيحس بباقي الناس
عشان حتي لو بصيت شوية فى دينك هتلاقيه بيحثك على أنك تعمل كده
وحتي بقي لو مش فى ايديك أنك تعمل حاجة للناس دي كلها وللبلد كلها
حاول تبقي بس بكلامك بأفكارك بوجهات نظرك بإحساسك تبقي مع الناس دي.......... وبس...