NDE
اختصار ل
Near Death Experience
تجربة القرب من الموت
يمكن موضوع غريب شوية أني أرجع بيه بعد مدة من الصمت
بس الموضوع فيه دماغي بقاله كتير
هى تجربة ناس كتيرة حصلتلهم واتكلموا عنها وتمت دراستها
هى ببساطة شديدة وزي ما واضح فى الاسم
تجربة أنك تقرب قوووووي من الموت
يبقي قدامك وحاسس بيه وأن دي فعلا النهاية
ناس حكوا أنهم شافوا النفق المظلم اللى فى آخره نور
ناس حكوا أنهم شافوا حياتهم كلها بتمر قدامهم
وناس شافوا كأنهم طالعين للسما
أيا كان اللى بيتشاف وقتها
أكيد دي تجربة صعبة جدااا بس مفيدة جدااا لو الإنسان استغلها صح
بيقدر يعيد حسابات حاجات كتيرة قووووي
أنك فجأة مش قادر تتنفس
عقلك بيدي أوامر بس مفيش أى إستجابة من جسدك
مفيش أى حاجة فى ايديك أنك تعملها غير أنك تقول الشهادة وأنت بتفكر "هي دي النهاية؟"
ممكن ترجع وجسمك يستجيب لعقلك ورئتك ترجع تتنفس والقلب ينبض تاني بشكل سليم
ساعتها حاجات كتيرة هتتغير معاك
يمكن حد يسأل أنا عاوزة أوصل لأيه
ببساطة عاوزة أوصل أن أكيد تجربة زي دي بتعتبر زي منبه للإنسان عشان يمكن يكون بعد عن ربنا فيرجع تاني
يمكن بيغلط كتير وربنا -سبحانه وتعالي- عاوز يفوقه من تاني
وكمان عشان ساعات فيه حاجات بتشغل تفكيرنا قوووووي
ومش قادرين نبطل تفكير فيها
نعيد التفكير فيها مرة تانية
يعني بقالي كتير قوووووي مستنية النهاية
نهاية حاجات كتيرة قوي كنت عاوزة أوصلها
ومش عارفة أوصل
الغريب أن فجأة تلاقي نهاية تانية خااالص بتقرب منك
معتقدش خااالص أني من النوع المتمسك بالحياة قووي وبيحبها وكده
أه بخاف من الموت بس عشان مش عارفة ايه أنا اللى عملته ده ينفع يدخلني جنة ولا لأ
حاسة أن المفروض الواحد يقرب أكتر من كده لربنا
وغير كده حاسة أني محتاجة اعرف نهايات كتيرة لحاجات بقالي كتير مستنية أنها تحصل وقربت أفقد الأمل خلاص
بس فعلا حاسة أني محتاجة أعرفها
ربنا يستر ويوفقنا للى فيه الخير لينا
ومعلش لو الموضوع كئيب شوية بس قلت كفاية عليه قعاد فى دماغي كل ده :)
سلااااااام
هناك 5 تعليقات:
أيه الصوره الحلوة دي :D
طبعا الموضوع دا مهم وخطير في نفس الوقت لأن أوقات الواحد بتحصله مواقف كتير وحشه ورا بعضها فطبعا يعتقد إن دا أسؤ حاجه بس دي مش الحقيقه
الحقيقه إن الوضع ممكن يبقي أسؤ بكتير بس رحمه ربنا كبيره أوووي
ونعرف إن الدنيا منوره بس أحنا الي مغمضين :)
welcome back
جميل جدا يا سارة انك تفكرى بالطريقة دى فعلا...
والاجمل من كدا انك تطبقى وتحاولى بقدر الامكان تحققى دا...
والاجمل من كدا بقى انك تسلمى امرك لله بمعنى الكلمة..يعنى متفكريش فى نهاية الحجات اللى انتى بتفكرى فيها دى عيشى اليوم بيومة وسيبة بكرة لله لانه ف علم الغيب مش حتعرفي بكرة الا اما توصليلية ويبقى "انهاردة" ..
الاحسن متتعبيش نفسك :D
تدوينة جميلة يا سارة ,
بس مش شرط ان التنبيه ييجي بالشعور بالموت أي موقف ممكن يحصلك لو فكرتي فيه حصل ليه غالباً هتلاقيه رسالة من ربنا وده ميزة التدبر والتأمل في دنيا الخالق عز وجل .
في رسايل كتير بتوصلنا بس احنا للاسف مبنفهمهاش لان احنا بنفكر في اللي عايزين نفكر فيه بس وبننسى حاجات كتير منفكرش فيها ومبنسألش ليه حصل الموقف ده . وفي الاخر إحنا بننفذ القدر اللي مكتوبلنا
شكرا يا سارة على التدوينة الجميلة دي
فعلا موضوع مهم يالالا
بس للأسف الناس مش بتفكر بالطريقة دى يعنى حاسة لو فكروا بالطريقة دى
كل واحد هيراجع نفسه فى كل حاجة عملها قبل كده
وكل حاجة هيعملها بعد كده بس كمان مش لازم نفكر فى الموت كده على طول عشان هنتعب أكتر أكيد كلنا بنمر بمواقف بنحس فيها إن كده خلاص مش عايزين نكمل ونتمنى فيها الموت بس مفكرناسش اللى عملناه فى دنيتنا يكفى إن إحنا نموت دلوقتى ومش نكمل ولا لسه محتاجين كتيييير
وبعد ما ينتهى المواقف دى وترجع تانى لحياتك وتبقى سعيد نفكر هو إحنا إزاى كنا بنفكر كده وإزاى كنا بنتمنى بالطريقة دى الموت
شكرااا يالالا :)
جميل يا سارة :)
كمان ممكن يجيلك الشعور ده من موت حد قريب منك او اي حاجة تحصل له
اوحد انتي عارفاه
يعني مش لما انتي بس اللي تتحطي في الموقف
ربنا يحسن خواتيمنا :)
إرسال تعليق